Tikhulu 13 - Siswati 1996 Bible

Kutalwa kwaSamsoni

¹ Baka-Israyeli baphindza benta lokubi emehlweni aSimakadze; ngako Simakadze wabanikela esandleni sema-Filisti iminyaka lengema-40.

² Kwakukhona lenye indvodza yaseSora lekwakunguManowa, libito layo, iyesive sakaDani. Lendvodza yayinemfati loyinyumba, angenabantfwana.

³ Ingilosi yaSimakadze yabonakala kulomfati, yatsi: “Uyinyumba, ute bantfwana, kodvwa sewutawukhulelwa, utale indvodzana.

⁴ Ticaphele wena-ke kutsi ungalinatsi liwayini nome ngabe sengusiphi-ke sinatfo lesivutjelwe, futsi ungasadli lutfo lolungcolile ngekwemtsetfo,

⁵ ngobe utawukhulelwa utale indvodzana. Kute insingo leyawusetjentiswa enhloko yakhe, ngobe lomfana uyawuba ngumNaziri lowehlukaniselwe Nkulunkulu kwasekutalweni kwakhe. Nguye lotawucala kukhulula sive sema-Israyeli esandleni semaFilisti.”

⁶ Lomfati-ke wabe sewuya endvodzeni yakhe, wafike wayibikela watsi: “Kufike umuntfu waNkulunkulu kimi. Simo sakhe bekungatsi yingilosi yaNkulunkulu; abesabeka kakhulu. Nami angikabe ngisabuta nekutsi uphumaphi, naye akangitjeli nelibito lakhe.

⁷ Kodvwa utsite kimi: ‘Utawukhulelwa, utale indvodzana. Manje-ke ungabe usalinatsa liwayini nome ngabe sengusiphi-ke sinatfo lesivutjelwe. Ungasadli lutfo lolungcolile ngekwemtsetfo, ngobe lomfana uyawuba ngumNaziri lowehlukaniselwe Nkulunkulu kusukela ekutalweni kwakhe kuze kube lilanga lekufa kwakhe.’ ”

⁸ Ngako Manowa wase uyathandaza kuSimakadze, watsi: “Awu, Simakadze, ngiyakuncenga kutsi mane lowo muntfu waNkulunkulu lomtfumele lapha kitsi aphindze abuye atesifundzisa kutsi lomfana lotawutalwa sitamkhulisa kanjani.”

⁹ Nkulunkulu wamuva Manowa, ingilosi yaSimakadze yaphindze yabuya futsi kulomfati, yefika ngesikhatsi asensimini, ayedvwa. Indvodza yakhe, Manowa, beyingekho kanye naye.

¹⁰ Lomfati waphutfuma wayawubikela indvodza yakhe, watsi: “Sewukhona! Lomuntfu lowabonakala kimi ngalela langa sewuphindze ubuyile.”

¹¹ Manowa wasukuma walandzela umfati wakhe. Watsi nakefika kulomuntfu, wambuta, watsi: “Unguye yini lona lowafika wakhuluma kumkami?” Watsi: “Nginguye.”

¹² Ngako Manowa wambuta, watsi: “Ngesikhatsi emavi akho asagcwalisekile, kuyawuba yini imiyalo ngemphilo nangemisebenti yalomfana?”

¹³ Ingilosi yaSimakadze yaphendvula Manowa, yatsi: “Umkakho kufanele ente konkhe loko lengimtjele kona.

¹⁴ Kufanele angadli lutfo loluhlutwe emvinini, anganatsi lutfo lolwentiwe ngewayini nome ngangusiphi sinatfo lesivutjelwe, angadli nalutfo lolungcolile ngekwemtsetfo. Kufanele ente konkhe loku lengimtjele kona.”

¹⁵ Manowa wakhuluma engilosini, watsi: “Sitawucela mane sewume kuhamba, size sikulungisele kwesibhutatana.”

¹⁶ Ingilosi yaSimakadze yatsi: “Nome ningangilibatisa, ngingeke ngikudle nakunye kudla kwenu. Kodvwa naningalungisa umnikelo wekushiswa, wunikeleni kuSimakadze.” Manowa bekangaboni lokutsi yingilosi yaSimakadze.

¹⁷ Manowa wase ubuta lengilosi yaSimakadze, watsi: “Ngubani libito lakho, kuze sitekubonga nasagcwalisekile lamavi akho?”

¹⁸ Yaphendvula yatsi: “Ungibutelani libito lami? Alicondzakali.”

¹⁹ Manowa wase ubamba sibhutatana kanye nemnikelo walokutinhlavu, wakwenta umhlatjelo etikwelidvwala, wakunikela kuSimakadze. Simakadze wenta intfo lemangalisako ngesikhatsi boManowa nemkakhe babukela.

²⁰ Atsi lamalangabi asalanguka esuka lapha elatini acondze ezulwini, lengilosi yaSimakadze yagibela kulamalangabi yenyukela ezulwini. Batsi nabakubona loko, boManowa nemkakhe bawa phansi ngebuso, bakhotsama.

²¹ Yatsi kube inyamalale lengilosi yaSimakadze kuboManowa nemkakhe, bangasayiboni, Manowa kwaba ngukhona asanguluka abona kutsi bekuyingilosi yaSimakadze.

²² Manowa wakhuluma kumkakhe, watsi: “Sitakufa! Sibone Nkulunkulu!”

²³ Kodvwa umkakhe wamphendvula, watsi: “Kube Simakadze abecondze kusibulala, ngabe akawemukeli lomnikelo wekushiswa nemnikelo walokutinhlavu lovela esandleni setfu, ngabe akasikhombisi tonkhe letintfo, wabuye wasitjela naloku.”

²⁴ LomkaManowa watala indvodzana, wayetsa libito watsi nguSamsoni. Wakhula, Simakadze wambusisa,

²⁵ naMoya waSimakadze wacala kumnyakatisa ngesikhatsi aseMahane Dani, emkhatsini weSora ne-Eshtayoli.