Tikhulu 12 - Siswati 1996 Bible

Jeftha nebaka-Efrayimu

¹ Emadvodza aka-Efrayimu abutsana, ashuca ewelela ngesheya kulaseSafoni, afike akhuluma kuJeftha, atsi: “Wentiwe yini lokutsi nawuhamba uyakulwa nema-Amoni ungasibiti tsine kutsi sihambe nawe? Sitawulumeka lendlu yakho siyishisele etikwenhloko yakho.”

² Jeftha wabaphendvula, watsi: “Mine nebantfu bami besinekucabana lokukhulu kabi nema-Amoni, nani-ke ngatsi ngiyanibita nangete neta kutangephula esandleni sawo.

³ Ngatsi kube ngibone kutsi ningeke ningisite, ngatidzela ematsambo ngewela ngayakulwa nema-Amoni. Simakadze wawanikela esandleni sami, ngawancoba. Manje-ke seniteleni lamuhla kutengilwisa ngaloko?”

⁴ Jeftha wase ubutsa onkhe emadvodza akaGileyadi, walwa nebaka-Efrayimu. BakaGileyadi babashaya babehlula baka-Efrayimu. Baka-Efrayimu bebatsite: “Nine maGileyadi lenika-Efrayimu nakaManase, ningemambuka aka-Efrayimu!”

⁵ BakaGileyadi bavimba onkhe ematubuko emfula iJordane lewelela ka-Efrayimu. Kwakutsi njalo nakukhona lophunyulile waka-Efrayimu, afike atsi: “Ngicela kwewela,” emadvodza akaGileyadi ambute atsi: “Ngekwakho uwaka-Efrayimu yini?” Nakaphendvule watsi: “Cha,”

⁶ babetsi: “Kulungile-ke, tsani: ‘Shibholethi.’ ” Nangabe atsite: “Sibholeti,” ngobe ehluleke kubita kahle leligama, babembamba bambulalele khona lapho etubukweni lemfula iJordane. Baka-Efrayimu labababulala kanjalo baba ti-42 000 ngaleso sikhatsi.

⁷ Jeftha wahola sive sema-Israyeli iminyaka lesitfupha. Jeftha, labengumGileyadi, wafa, wangcwatjwa edolobheni lakaGileyadi.

Bo-Ibsani, na-Eloni, na-Abdoni

⁸ EmvakwaJeftha kwavela Ibsani waseBhetlehema, waba ngumholi wema-Israyeli.

⁹ Abenemadvodzana langema-30 nemadvodzakati langema-30. Lamadvodzakati akhe wawendzisela letinye tinsendvo letatingesilo lusendvo lwakhe, nalamadvodzana akhe wawatsatsela bafati ngaphandle kulababengesibo belusendvo lwakhe. Ibsani wahola sive sema-Israyeli iminyaka lesikhombisa.

¹⁰ Ibsani wabe sewuyafa, wangcwatjwa eBhetlehema.

¹¹ Emvakwakhe kwavela Eloni, labewesive sakaZebuloni; wahola sive sema-Israyeli iminyaka lelishumi.

¹² Eloni wabe sewuyafa, wangcwatjwa e-Ayaloni, eveni lakaZebuloni.

¹³ Emvakwakhe kwavela Abdoni, umsa waHileli, wasePhirathoni, wahola sive sema-Israyeli.

¹⁴ Abdoni abenemadvodzana langema-40 nebatukulu labangema-30, babegibela timbongolo letingema-70. Yena-ke wahola sive sema-Israyeli iminyaka lesiphohlongo.

¹⁵ Abdoni, umsa waHileli, wasePhirathoni, wafa wangcwatjwa ePhirathoni kulaka-Efrayimu, eveni letintsaba lema-Amaleki.