Tikhulu 11 - Siswati 1996 Bible

Kuncoba kwaJeftha nesetsembiso sakhe

¹ Jeftha bekuyingwazi yakaGileyadi. Uyise, Gileyadi, abemtele kulenye nje ingwadla.

² Gileyadi abenalamanye emadvodzana, labewatalelwe ngumkakhe. Atsi kube akhule lamadvodzana, ase ayamcosha Jeftha lapha ekhaya, atsi: “Ungeke usitfole sabelo lesilifa kulomndeni wakitsi, ngobe wena uyindvodzana yakalomunye umfati.”

³ Ngako-ke Jeftha wabaleka ekhaya kubo, abalekela bomnakabo, wayawuhlala eveni lakaThobu, lapho efika kwabutsana tonkhe tihlophoyi kuye, tamsingatsa, tamlandzela, taphuma naye.

⁴ Kwatsi ngalesinye sikhatsi sive saka-Amoni nasiyawuhlasela ema-Israyeli,

⁵ tibondza takaGileyadi tahamba tayawulandza Jeftha eveni lakaThobu,

⁶ tafike tatsi: “Wota utewuba yindvuna yetfu, kuze sikwati kulwa nema-Amoni.”

⁷ Jeftha wakhuluma kuto, watsi: “Angitsi nine nangitondza, naze nangicosha nasekhaya kitsi? Manje senitelani kimi ngobe senisenhluphekweni?”

⁸ Tibondza takaGileyadi tamphendvula, tatsi: “Noko sesigucukela kuwe nyalo, hamba natsi siyekulwa nema-Amoni, sitakwenta ube ngumholi wetfu kubo bonkhe labakhile kuleli lakaGileyadi.”

⁹ Jeftha watiphendvula watsi: “Naningibuyisa ekhaya siyekulwa nema-Amoni, nakungenteka Simakadze awanikele kimi, nitangenta ngempela yini umholi wenu?”

¹⁰ Tibondza takaGileyadi tamphendvula, tatsi: “Simakadze ungufakazi wetfu, ngempela sitakwenta njengobe usho.”

¹¹ Ngako Jeftha wahamba naletibondza takaGileyadi, sive sonkhe safike samenta inhloko nemholi waso. Jeftha wawaphindzaphindza lamagama akhe aseMispa embikwaSimakadze.

¹² Ngako Jeftha wase utfumela tigijimi enkhosini yema-Amoni, wayibuta watsi: “Kukhona yini lesikone ngako, kutsi ungaze utewuhlasela live letfu?”

¹³ Inkhosi yema-Amoni yaphendvula letigijimi takaJeftha yatsi: “Kwatsi ema-Israyeli nakaphuma eGibhithe, efika lapha atsatsa live lami, kusukela e-Anoni kuze kuyewufika eJabhoki naseJordane. Manje-ke libuyiseni ngekuthula.”

¹⁴ Jeftha waphindza watfumela tigijimi enkhosini yema-Amoni,

¹⁵ tafike tatsi: “Jeftha utsi: ‘Ema-Israyeli akazange alitsatse live lemaMowabi nelive lema-Amoni.

¹⁶ Kodvwa atsi nakaphuma eveni laseGibhithe, ema-Israyeli ahamba lihlane acondza eLwandle Lolubovu, endlulela eKhadeshi.

¹⁷ Israyeli watfumela tigijimi enkhosini yaka-Edomu, tafike tatsi: “Sivumele sihambe sidzabule lelive lakho.” Kodvwa inkhosi yaka-Edomu, ayizange imvumele kuloko. Baka-Israyeli baphindza futsi batfumela nasenkhosini yakaMowabi, nayo yala; ngako baka-Israyeli bahlala eKhadeshi.

¹⁸ “ ‘Emvakwaloko bahamba bazula ehlane, bagega live laka-Edomu nelakaMowabi, baze befika ngasemphumalanga nelakaMowabi, bayawumisa ngesheya kwe-Anoni. Abazange bangene eminyeleni yelive lakaMowabi, ngobe i-Anoni bekunguwona mnyele walo.

¹⁹ “ ‘Baka-Israyeli base batfumela tigijimi kuSihoni, inkhosi yema-Amori, labebusa eHeshboni, batsi kuye: “Sicela mane sendlule eveni lakho, siye eveni letfu.”

²⁰ Kodvwa Sihoni akazange awetsembe ema-Israyeli kutsi angendlula eveni lakhe. Wabutsa yonkhe imphi yakhe wayakumisa eJahasi, walwa nawo ema-Israyeli.

²¹ “ ‘Simakadze Nkulunkulu wema-Israyeli wanikela Sihoni naso sonkhe sive sakhe esandleni sema-Israyeli, abehlula. Ngako baka-Israyeli balidla lonkhe lelo live ema-Amori labehlala kulo.

²² Alidla lonkhe lelo live, kusukela e-Anoni kuye eJabhoki; nekusuka ehlane kuye emfuleni iJordane.

²³ “ ‘Manje-ke njengobe Simakadze Nkulunkulu wema-Israyeli acosha ema-Amori ngaphambili kwesive sakhe, ema-Israyeli, wena-ke unalilungelo lini lekulidla lelo live?

²⁴ Ungete wamane ulidle kuphela lelo lonikwa lona ngunkulunkulu wakho longuKhemoshi? Ngalokunjalo natsi sitalidla lelo lesilinikwa nguSimakadze Nkulunkulu wetfu, kube letfu.

²⁵ Uncono yini wena kunaBhalaki, umsa waSiphori, inkhosi yemaMowabi? Yena wake wacabana yini nema-Israyeli nome walwa nawo?

²⁶ Kwaze kwaphela iminyaka lengema-300, baka-Israyeli bahlala eHeshboni, nase-Aroyeri, nasetabelweni letiyitungeletile, nakuwo onkhe emadolobha kuvundla ne-Anoni. Awuzange ubahlasele ngani-ke ngaleso sikhatsi ulidle lelive?

²⁷ Mine angikakoni ngalutfo, kodvwa nguwe lowonile ngekufuna kungihlasela ngemphi. Shangatsi Simakadze longuyena angumehluleli angakhipha sigwebo lamuhla emkhatsini wesive sema-Israyeli nesive sema-Amoni.’ ”

²⁸ Noko inkhosi yema-Amoni ayizange iwunake lombiko wayo lowawutfunyelwe nguJeftha.

²⁹ Moya waSimakadze wase wehlela kuJeftha. Wahamba wadzabula kulakaGileyadi nakulakaManase, wewelela ngesheya eMispa yakaGileyadi, wendlula lapho washuca wayawuhlasela ema-Amoni.

³⁰ Jeftha wenta sifungo kuSimakadze, watsi: “Nawunganikela ema-Amoni esandleni sami,

³¹ nome ngabe ngubani loyawuphuma kucala emnyango wendlu yami kungihlangabeta nase ngibuya ekuncobeni imphi yema-Amoni, uyawuba waSimakadze; ngiyawunikela ngaye abe ngumnikelo wekushiswa.”

³² Jeftha wesuka lapho wewela wayakulwa nema-Amoni, Simakadze wawanikela esandleni sakhe.

³³ Wabhubhisa emadolobha langema-20, kusukela e-Aroyeri kuze kuyewufika emacentselweni aseMinithi nase-Abela Kheramimu; acotfula imbokodvo nesisekelo. Ayincoba kanjalo-ke ema-Israyeli i-Amoni.

³⁴ Jeftha nase achamuka ekhaya lakhe lelaliseMispa, ngubani lobekangaphuma kucala amhlangabete ngaphandle kwentfombi yakakhe, leyaphuma igiya, itjakadvula, ishaya makhoyane wayo. Kwakukuphela kwayo vo! Ngaphandle kwayo abengenandvodzana nandvodzakati.

³⁵ Watsi nakayibona, waklebhula timphahla takhe, wakhala, watsi: “Awu, ndvodzakati yami! Ungidzabukisile wangihluphekisa, ngobe ngente sifungo kuSimakadze lengingasoze ngasephula.”

³⁶ Yona yaphendvula yatsi: “Babe, nangabe wente sincumo kuSimakadze, yenta kimi njengobe ufungile kuSimakadze, ngobe nguye lokuphindziselele etitseni takho, ema-Amoni.

³⁷ Kodvwa mane ungentele kube kunye. Ngicela umane unginike tinyanga tibe timbili ngibe ngedvwa, ngikhuphukele etintsabeni ngiyewuzula khona, ngililele buntfombi bami, mine kanye nabontsanga yetfu.”

³⁸ Uyise watsi: “Hamba.” Wayikhulula, yahamba tinyanga letimbili. Yona nebangani bayo bakhuphukela etintsabeni bayawulilela buntfombi bayo.

³⁹ Kwatsi kube kuphele letinyanga letimbili, yehla yabuyela kuyise. Uyise wenta kuyo njengobe abefungile. Bekuyintfombi leyayingayati indvodza. Lavela lapho-ke lisiko lema-Israyeli,

⁴⁰ lekutsi njalo nje ngemnyaka emantfombatana langema-Israyeli ahamba emalanga lamane ayekwenta umkhosi wekukhumbula indvodzakati yaJeftha wakaGileyadi.