Tikhulu 1 - Siswati 1996 Bible

Sive sakaJuda nesakaSimeyoni titfumba Adoni Bhezeki

¹ Emvakwekufa kwaJoshuwa, ema-Israyeli abuta Simakadze, atsi: “Ngubani lotakwenyuka kucala ayekusilwela nemaKhenani?”

² Simakadze wawaphendvula watsi: “BakaJuda abenyuke; lelive ngilinikele etandleni tabo.”

³ Emadvodza akaJuda akhuluma kubakaSimeyoni, bomnakabo, atsi: “Yenyukani kanye natsi, siye eveni lesabelwe lona, siyekulwa nemaKhenani. Natsi siyakuhamba nani naniya kulenu.” Ngako bakaSimeyoni bahamba nabo bakaJuda.

⁴ Kwatsi bakaJuda nabahlasela, Simakadze wanikela etandleni tabo emaKhenani nemaPheresi; babulala emadvodza lati-10 000 eBhezeki.

⁵ Ngulapho-ke lapho bakhandza Adoni Bhezeki khona, balwa naye; bawehlula emaKhenani nemaPheresi.

⁶ Adoni Bhezeki wabaleka, kodvwa bamcosha baze bambamba, bamjuba titfupha takhe naboqukulu bakhe.

⁷ Adoni Bhezeki wakhuluma watsi: “Emakhosi langema-70 labejutjwe titfupha tawo kanye naboqukulu bawo abevame kubutsa timvutfuluka ngaphansi kwelitafula lami. Nyalo Nkulunkulu sewungibuyisele ngaloko lengakwenta kubo.” Beta naye eJerusalema, wafike wafela lapho.

Sive sakaJuda sitfumba iJerusalema neHebroni

⁸ Emadvodza akaJuda ahlasela iJerusalema, ayitfumba. Lelo dolobha balibhubhisa ngelusiko lwenkemba, base balokhela ngemlilo.

⁹ Emvakwaloko emadvodza akaJuda ehla ayakulwa nemaKhenani labehlala eveni letintsaba, naseNegevu, eningizimu nelive, kanye nasematsafeni labengasenshonalanga.

¹⁰ Ahloma ayawuhlasela emaKhenani labehlala eHebroni, leyayike yabitwa ngekutsi yiKhiriyathi Abha, ehlula boSheshayi, na-Ahimani kanye naThalmayi.

Othniyeli uncoba lidolobha iDebiri

¹¹ Esuka lapho ahloma ayawuhlasela bantfu lababehlala eDebiri, leyayike yabitwa ngekutsi yiKhiriyathi Seferi.

¹² Khalebi wakhuluma watsi: “Lowo lotawuhlasela atfumbe iKhiriyathi Seferi, ngitamnika indvodzakati yami, Akhisa, kutsi ashade nayo.”

¹³ Othniyeli, umsa waKhenazi, umnakaboKhalebi lomncane, wayihlasela wayehlula; ngako Khalebi wamnika indvodzakati yakhe, Akhisa, kutsi ayitsatse ashade nayo.

¹⁴ Ngalelinye lilanga Akhisa weta ku-Othniyeli, wafike wamcela kutsi akacele insimi kuKhalebi, uyise. Watsi Akhisa nakehla embongolweni, Khalebi wambuta watsi: “Ngingakwentelani?”

¹⁵ Akhisa waphendvula watsi: “Ase umane ungisite ngentfo yinye. Njengobe sewungabele indzawo eNegevu, iningizimu nelive lakaJuda, ase umane ungiphe naletiyalu temanti.” Ngako Khalebi wabe sewumnika letiyalu letatingenhla kanye naletatingentansi.

Kuncoba kwetive takaJuda nesakaBhenjamini

¹⁶ Titukulwane teyisetala waMosi, emaKheni, takhuphuka eDolobheni Lemasundvu tahamba nemphi yakaJuda tayawukwakha ehlane laseJudiya, eveni laseNegevu lekuyiningizimu yelive, eceleni kwase-Aradi.

¹⁷ Emadvodza akaJuda ahamba nesive sakaSimeyoni, bomnakabo, ayawuhlasela emaKhenani labehlala eSefathi, balibhubhisa balicedza lonkhe lelo dolobha. Ngako labe selibitwa ngekutsi yiHoma.

¹⁸ Imphi yakaJuda yatfumba iGaza, ne-Ashkeloni kanye ne-Ekroni. Ngulelo nalelo dolobha yayifike ilitfumbe kanye nelive lalo lonkhe.

¹⁹ Simakadze abenayo imphi yakaJuda. Yadla live letintsaba, kodvwa noko abakhonanga kucosha bantfu bakhona kulawo matsafa, ngobe bantfu bakhona babenetincola tetinsimbi.

²⁰ Njengobe Mosi bekakhulumile, iHebroni yabelwa Khalebi, lokunguyena acosha kuyo emadvodzana lamatsatfu aka-Anaki.

²¹ Sive sakaBhenjamini sona sehluleka kucosha emaJebhusi labehlala eJerusalema. Kuze kube ngulamuhla emaJebhusi ahlala lapho kanye nesive sakaBhenjamini.

Tive taka-Efrayimu nesakaManase tihlasela iBetheli

²² Umndeni wakaJosefa nawo wahlasela iBetheli, kantsi futsi naSimakadze abenawo.

²³ Batsi nabatfumela tinhloli eBetheli leyayikadze yatiwa ngekutsi yiLuzi,

²⁴ letinhloli tabona indvodza iphuma kulelidolobha, tase tikhuluma kuyo titsi: “Silayele kutsi singangena kanjani kulelidolobha, tsine siyawukunakekela sikuphatse kahle.”

²⁵ Ngako lendvodza yabakhombisa lelo dolobha; balibhubhisa ngelusiko lwenkemba, kodvwa lendvodza bayiyekela kanye nemndeni wayo wonkhe.

²⁶ Lendvodza yesuka lapho yayawukhonta eveni lemaHethi, lapho yefike yakha lidolobha leyaletsa libito layo yatsi yiLuzi; lelo kuselibito lalo nalamuhla.

Tive letingazange ticoshwe ngema-Israyeli

²⁷ Manase yena akazange abacoshe baseBhethi Shani, nebaseThanaki, nebaseDori, nebase-Jibleyamu, nebaseMegido kanye netabelo letatitungelete letindzawo, ngobe emaKhenani bekatimisele kutsi ahlale kulelo live.

²⁸ Kwatsi kube sive sema-Israyeli sandze sibe nemandla, sawacindzetela emaKhenani kutsi asebentele sona, kodvwa sangete sawacosha.

²⁹ Sive saka-Efrayimu naso asizange siwacoshe emaKhenani labehlala eGezeri, kodvwa emaKhenani achubeka ahlala kanye naso kulelo live.

³⁰ Sive sakaZebuloni naso asizange siwacoshe emaKhenani labehlala eKhitroni naseNahaloli emkhatsini waso. Sahlala nawo, kodvwa sawacindzetela kutsi asebentele sona.

³¹ Sive saka-Asheri naso asizange siwacoshe lawo maKhenani labehlala e-Akho, naseSidoni, nase-Ahilabi, nase-Akzibi, naseHelba, nase-Afeki kanye naseRehobu;

³² ngenca yaloko sive saka-Asheri sahlala emkhatsini wetakhamiti letatingemaKhenani alelo live.

³³ Sive sakaNaftali naso asizange siwacoshe lawo maKhenani labehlala eBhethi Shemeshi naseBhethi Anathi; kodvwa naso sive sakaNaftali sahlala emkhatsini wetakhamiti letatingemaKhenani alelo live, kwase kutsi lawo labehlala eBhethi Shemeshi naseBhethi Anathi sawacindzetela kutsi asebentele sona.

³⁴ Ema-Amori wona acindzetela sive sakaDani kutsi sihlale eveni letintsaba, akazange asivumele kutsi sehlele ematsafeni;

³⁵ kantsi futsi ema-Amori abetimisele kuhlala eNtsabeni iHeresi, ne-Ayaloni, neShalbimu; kodvwa kwatsi kube emandla esive sakaJosefa akhule, nawo futsi acindzetelwa kutsi asebentele sona.

³⁶ Umnyele welive lema-Amori wawusuka etulu emsahweni wase-Akrabhimu, ucondze eSela uchubeke wenyuke.