Tihlabelelo 96 - Siswati 1996 Bible

Simakadze uyabusa

¹ Hlabelani ingoma lensha kuSimakadze, hlabelani kuSimakadze, mhlaba wonkhe!

² Hlabelani kuSimakadze, nidvumise libito lakhe, memetelani insindziso yakhe imihla ngemihla.

³ Vakalisani bukhosi bakhe etiveni, nitjele tonkhe tive ngetimanga takhe.

⁴ Simakadze mkhulu, ufanele kudvunyiswa kakhulu, ufanele kwesatjwa kunabo bonkhe bonkulunkulu.

⁵ Ngobe bonkhe bonkulunkulu betive batithico, kantsi nguSimakadze lowenta emazulu.

⁶ Ludvumo nebukhosi kusembikwakhe, emandla nenkhatimulo kusendlini yakhe lengcwele.

⁷ Phakamisani Simakadze esikhundleni sakhe, nine mindeni yetive. Nikani Simakadze ludvumo nemandla.

⁸ Nikani Simakadze lolufanele ludvumo libito lakhe. Ngenani emabaleni endlu yakhe, niletse kuye umnikelo.

⁹ Khotsamani nikhuleke kuSimakadze, nembatse bungcwele, nitfutfumele embikwakhe, mhlaba wonkhe.

¹⁰ Memetelani emkhatsini wetive nitsi: “Simakadze yiNkhosi, uyabusa! Yebo, umhlaba usinyisiwe, ungeke utanyatanyiswe, nguye loyakwehlulela tive ngebucotfo.”

¹¹ Jabulani mazulu, tsakasa nawe mhlaba, kubhodle lwandle nako konkhe lokukulo.

¹² Emadlelo, nako konkhe lokukuwo, akujabule, tonkhe tihlahla tesiganga atijabule

¹³ embikwaSimakadze, ngobe uyeta, yebo, uyeta kutakwehlulela umhlaba. Uyakwehlulela umhlaba ngekulunga, yebo, ehlulele tive ngekwetsembeka kwakhe.