Tihlabelelo 95 - Siswati 1996 Bible

Sekudvumisa nekukhonta Nkulunkulu

¹ Wotani, sitewuhlabela kuSimakadze, sihlabele ngenjabulo kulo lidvwala lensindziso yetfu!

² Asiye kuye ngekuhlabela, simbonge ngetibongo nangetingoma.

³ Ngobe Simakadze nguNkulunkulu lomkhulu, unguMbusi lomkhulu lonemandla kunabo bonkhe bonkulunkulu.

⁴ Esandleni sakhe kunekujula kwemhlaba, kanye nekuphakama kwetintsaba.

⁵ Lwandle lwakhe, ngobe walwenta, nemhlaba lowomile wakhe, ngobe wawubumba ngetandla takhe.

⁶ Wotani, sikhuleke, simkhotsamele, asiguce embikwaSimakadze, uMenti wetfu.

⁷ Ngobe yena unguNkulunkulu wetfu, tsine sitimvu telidlelo lakhe, nesive lesisetandleni takhe. Lamuhla shangatsi ningalilalela livi lakhe nalitsi:

⁸ “Ningatenti lukhuni tinhlitiyo tenu, njengaseMeribha nanjengamhlazane baseMasa,

⁹ lapho bangilinga khona boyihlo, bangivivinya, nome babeyibonile imisebenti yami.

¹⁰ Iminyaka lengemashumi lamane nganengwa nguleso sive, ngadzimate ngatsi: ‘Basive, lesinhlitiyo yaso yedukile, abaticaphelanga tindlela tami.’

¹¹ Ngako-ke ngatfukutsela ngadzimate ngafunga ngabo ngatsi: ‘Bangeke bangene ekuphumuleni kwami.’ ”