Tihlabelelo 94 - Siswati 1996 Bible

Umthandazo wekucela kuphindziselwa

¹ Yebo, Simakadze, nguwe Nkulunkulu wemphindziselo! Wena unguNkulunkulu wekuphindzisela. Phumela ebaleni ukhanye.

² Phakama, Mehluleli wemhlaba, uphindzisele kubemhlaba labatidlako.

³ Awu, Simakadze! Kuyawuze kube ngunini lababi batikhukhumeta? Kuyawuze kube ngunini lababi bachoshile?

⁴ Kuyawuze kube ngunini lababi batidla bakhuluma kabi bahlambalata?

⁵ Simakadze, sive sakho bayasipitjita, balinyatsela phansi lifa lakho.

⁶ Babulala bafelokati, netihambi, basontse netintsandzane, ngobe tite boyise.

⁷ Batsi: “Simakadze akaboni, Nkulunkulu waJakobe akanaki.”

⁸ Caphelani nine leninenhloko lelukhuni, emkhatsini wesive. Nine tilima, niyawuhlakanipha nini?

⁹ Nguye lowadala indlebe, pho, angehluleka yini kuva? Nguye lowadala liso, pho, angehluleka yini kubona?

¹⁰ Nguye longumcondzisi wetive, pho, angeke ehlulele yini? Nguye lofundzisa lwati kubo bonkhe bantfu, pho, angabate kanjani lwati?

¹¹ Simakadze uyayati imicabango yebantfu, kutsi ifana nemoya lotsi shwi wendlule.

¹² Yebo, Simakadze! Ubusisiwe umuntfu loyalwa nguwe, afundziswe nguwe emtsetfweni wakho,

¹³ umuphe kuthula ngesikhatsi sebumatima, kusambiwa umgodzi wekuchilitela lababi.

¹⁴ Ngobe Simakadze angeke asilahle sive sakhe, angeke alishiye lifa lakhe.

¹⁵ Kulunga kuyawuphindze kubuyele ekwehlulelweni, bonkhe labacotfo ngenhlitiyo bayawukulandzela.

¹⁶ Ngubani longangisita kulababi? Ngubani longangiphendvula kulabaphambene nami?

¹⁷ Kube Simakadze abengesilo lusito lwami, ngabe ngasheshe ngafa.

¹⁸ Ngatsi nangifuna kutsi: “Naku sengiwa,” Simakadze wangisekela ngemusa wakhe, ngabuye ngema futsi.

¹⁹ Ngesikhatsi inhlitiyo yami iphitsiteliswa ngimicabango, kudvudvuta kwakho kuyawutfokotisa umphefumulo wami.

²⁰ Babusi lababi bangaba nenhlanganyelo yini nawe, labo labenta bubi kube shangatsi ngumtsetfo?

²¹ Bakha lisu lekuhlasela labalungile, balahla bantfu labangenacala.

²² Kodvwa Simakadze uyinqaba yami, Nkulunkulu wami ulidvwala lelisiphephelo sami.

²³ Uyawukwehlisela tono tabo etikwabo, ababhubhise ngenca yebubi babo; Simakadze, Nkulunkulu wetfu, uyawubabhubhisa.