Tihlabelelo 93 - Siswati 1996 Bible

Simakadze uyiNkhosi

¹ Simakadze uyabusa, wembetse inkhatimulo, Simakadze wembetse, wavunula emandla. Ngempela, umhlaba wonkhe utintile, ungeke utanyatanyiswe.

² Sihlalo sakho sebukhosi seloku sema sicinile kwasemandvulweni, wena wawuvele ukhona kwasemaphakadzeni.

³ Imifula idlondlobele, Simakadze, imifula idlondlobele ngekuhlokoma, imifula idlondlobele ngekudvuma.

⁴ Kepha wena, Simakadze, umkhulu kunekudvuma kwemanti lamanyenti, umkhulu kunemagagasi aselwandle.

⁵ Bufakazi bakho buciniseke kakhulu, bungcwele buyifanele indlu yakho, phakadze naphakadze, Simakadze.