Tihlabelelo 91 - Siswati 1996 Bible

Kukhosela ngaphansi kwemtfunti waSomandla

¹ Lowo lohlala ekusitsekeni kuLosetikwako Konkhe ukhosele ekhwapheni laSomandla.

² Angasho kuSimakadze atsi: “Wena usiphephelo sami nenqaba yami, unguNkulunkulu wami lengetsembele kuye.”

³ Nguye-ke Simakadze lotakwephula elugibeni lwebacuphi, akuvikele nasetifeni letitsatselwanako.

⁴ Uyawukusibekela ngetimphiko takhe, uphephele ngaphansi kwemaphiko akhe, kwetsembeka kwakhe kulihawu lekukuvikela.

⁵ Awudzingi kwesaba tingoti tasebusuku, nemicibisholo lentjuzako emini,

⁶ nengoti lenkhulu levumbuka ebumnyameni, namashayacotfule wesifo lobhubhisako emini.

⁷ Labatinkhulungwane bangawa eceleni kwakho, nalabatinkhulungwane letilishumi bawele ngasesandleni sakho sekudla, kodvwa wena usale ungenamyocu.

⁸ Uyawubuka nje kuphela ngemehlo akho, ubone kujeziswa kwalababi.

⁹ Ngobe wena Simakadze umente waba siphephelo sakho, Losetikwako Konkhe umente inqaba yakho.

¹⁰ Ungeke wehlelwe ngemashwa, nesifo singeke sisondzele ekhaya lakho.

¹¹ Ngobe Nkulunkulu uyawuyala tingilosi takhe ngawe tikulondvolote ekuhambeni kwakho konkhe.

¹² Tiyawukutsatsa tikwetfwale ngetandla, kuze lunyawo lwakho lungete lwakhutjwa etjeni.

¹³ Uyawuhamba etikwemabhubesi netinyoka, ugcobagcobe etikwemawundlu emabhubesi kanye nasetikwetinyoka.

¹⁴ Nkulunkulu yena utsi: “Njengobe naku ubambelele kimi ngelutsandvo, ngitamephula ngimbeke endzaweni lephakeme, ngimvikele ngobe alati libito lami.

¹⁵ Uyawungibita ngiphendvule ngibe naye ekuhluphekeni, ngimuphe kuphepha nekuhlonipheka.

¹⁶ Ngiyawumesutsisa ngebudze bemalanga akhe ngimkhombise emandla ensindziso yami.”