Tihlabelelo 90 - Siswati 1996 Bible

Sigaba sesine (Tihlabelelo 90 – 106) Emalanga emuntfu asheshe aphele emhlabeni

Umthandazo waMosi, umuntfu waNkulunkulu.

¹ Yebo, Simakadze! Wena ube siphephelo setfu etitukulwaneni nasetitukulwaneni.

² Ngaphambi kwekudalwa kwetintsaba, yebo, ungakawudali nemhlaba, kusukela phakadze kuze kube phakadze, wena Nkulunkulu ukhona.

³ Umuntfu umbuyisela elutfulini utsi: “Buyelani nine bantfwana bebantfu nibe lutfuli lenabunjwa ngalo.”

⁴ Ngobe inkhulungwane yeminyaka kuwe ingangelilanga linye, injengelilanga layitolo nase lendlulile, yimfishane, ingangemlindvo wasebusuku.

⁵ Bantfu ubakhukhula njengesihlambi semanti, baphele njengebutfongo, ekuseni bakhula njengeluhlata:

⁶ nome ekuseni luyahluma luchakaze, kodvwa entsambama luyasikwa lubune.

⁷ Intfukutselo yakho isicedza emandla, lulaka lwakho luyasesabisa.

⁸ Bubi betfu busembikwakho, tono tetfu letifihlakele tisekukhanyeni kwebuso bakho.

⁹ Onkhe emalanga etfu ekuphila endlula ngaphansi kwelulaka lwakho, iminyaka yetfu iyefika ibuye yendlule, sincane sesibibitfwane sesikhashana.

¹⁰ Iminyaka yekuphila kwetfu ingiminyaka lengemashumi lasikhombisa, nangabe sisacinile iba ngiminyaka lengemashumi lasiphohlongo; noko linyenti laleyo minyaka seliphetse kuhlupheka nelusizi. Kuphila kwetfu kwendlula ngekushesha, yebo, siyandiza sihambe.

¹¹ Ngubani lowati emandla entfukutselo yakho, yebo, nelulaka lwakho, kuze akwesabe ngalokufanele?

¹² Sifundzise kutsi sikwati kubala emalanga etfu, kuze sibe nenhlitiyo lehlakaniphile.

¹³ Buya, Simakadze! Kuyawudzimate kube ngunini solomane usifulatsela? Hawukela tinceku takho.

¹⁴ Senelise ngemusa wakho njalo ekuseni, kuze sijabule sitfokote onkhe emalanga etfu letako.

¹⁵ Siphe emalanga ekujabula, langangemalanga ekusihlupha kwakho; akabe ngangeminyaka yekuhlupheka kwetfu.

¹⁶ Shangatsi tinceku takho tingake tikubone usebenta, nemandla akho ebukhosi abonakale nasetitukulwaneni tato.

¹⁷ Shangatsi lutsandvo lweNkhosi lenguNkulunkulu wetfu, lungabasetikwetfu. Shangatsi ungawubusisa umsebenti wetandla tetfu; yebo, phumelelisa umsebenti wetandla tetfu.