Tihlabelelo 84 - Siswati 1996 Bible

Kulangatela indlu yaNkulunkulu

Sihlabelelo sentalelwane yaKhora lesetfulwe kumhlabelisi kutsi sihlatjelwe ngelugubhu, igithithi.

¹ Maye, iyatsandzeka indlu yakho! Simakadze wemabandla!

² Umphefumulo wami ulangatelela emagceke akho, inhlitiyo yami nemtimba wami kuhlabela kumemete ngekujabula lokukhulu kuNkulunkulu lophilako.

³ Ncedze uyayitfola indzawo yesidleke, nenkonjane iyayitfola indzawo yekwakhela indlu yayo, lapho ingachobosela khona emazini ayo. Lendzawo ingasemalatini endlu yakho, Simakadze wemabandla, Nkhosi yami, naNkulunkulu wami.

⁴ Babusisiwe labo labahlala endlini yakho, bayawuhlala babonga wena njalo. Cabanga.

⁵ Babusisiwe labo bantfu emandla abo lakuwe, labalangatela etinhlitiyweni tabo kutsi bayewukhonta eSiyoni.

⁶ Bayawutsi nome bahamba eSigodzini Lesomile, kubo sibe yindzawo lechume tiyalu, netimvula tekucala timbonye tibusiso.

⁷ Bayatfutfuka emandleni baye emandleni; Nkulunkulu wabonkulunkulu uyawubonakala eSiyoni.

⁸ Hhawu, Simakadze, Nkulunkulu wemabandla, vani, ulalele umthandazo wami, beka indlebe yakho, Nkulunkulu waJakobe! Cabanga.

⁹ Nkulunkulu, buka sihlangu setfu, buka, ubone buso balogcotjiwe wakho.

¹⁰ Ngobe lilanga linye etibuyeni tendlu yakho, lincono kunalayinkhulungwane lacitselwe ngaphandle. Ngingamane ngibe ngumlindzi wemnyango wendlu yaNkulunkulu, kunekutsi ngingahlala ngibuse emakhaya alababi.

¹¹ Ngobe Simakadze, Nkulunkulu ulilanga letfu nesihlangu sekusivikela. Simakadze usipha umusa asente sihlonipheke. Angeke abagodlele lutfo loluhle labo labahamba ngebucotfo embikwakhe.

¹² Yebo, Simakadze wemabandla! Ubusisiwe umuntfu lowetsembele kuwe!