Tihlabelelo 81 - Siswati 1996 Bible

Kubeketela kwaNkulunkulu kubaka-Israyeli

Sihlabelelo sa-Asafa lesetfulwe kumhlabelisi kutsi sihlatjelwe ngelugubhu, igithithi.

¹ Hlabelani kuNkulunkulu longemandla etfu, jabulani nidvumise Nkulunkulu waJakobe.

² Calani ingoma, nishaye tingubhu, netingitali kanye nemahabhu.

³ Vutselani impalampala ekwetfwaseni kwenyanga, nangesikhatsi seyidvulungile ngelilanga lemkhosi wetfu.

⁴ Ngobe loku kusimiso saka-Israyeli, nemtsetfo waNkulunkulu waJakobe.

⁵ Wakwenta kwaba ngumtsetfo kuJosefa, mhlazana ayawukulwa nemaGibhithe. Ngeva livi lengangingalati litsi:

⁶ “Mine ngesusa umtfwalo emahlombe enu, nganiphumuta ekwetfwaleni kwenu titini.

⁷ Nangibita nisebunzimeni nganephula, nganiphendvula ngingale kwemafu lahlomile, nganivivinya emitfonjeni yaseMeribha. Cabanga.

⁸ “Lalelani, sive sami, nginiyale: Awu, ma-Israyeli! Shangatsi ngabe niyangilalela.

⁹ Ningamkhonti lomunye nkulunkulu, ningakhuleki kubonkulunkulu betive.

¹⁰ Ngimi Simakadze longuNkulunkulu wenu, lowanikhuphula eveni laseGibhithe. Khamisisani imilomo yenu, mine-ke ngitanifunta nginesutsise.

¹¹ “Kepha sive sami asililalelanga livi lami. Israyeli akazange anginake.

¹² Ngako-ke ngabayekelela enkhanini yetinhlitiyo tabo, kuze batihambele ngekutsandza kwabo.

¹³ Maye, kube sive sami siyangilalela na-Israyeli ahambe etindleleni tami!

¹⁴ Titsa tabo bengitatehlula ngekushesha, ngesandla sami bengitawumelana netitsa tabo.

¹⁵ Labangitondzako bebetawuta embikwami, bete bashosha phansi ngemadvolo, kujeziswa kwabo kuhlale ingunaphakadze.

¹⁶ Bengiyawunipha kolo lomnandzi kakhulu, yebo, bengiyawunesutsisa ngeluju lwetinyosi temadvwala.”