Tihlabelelo 78 - Siswati 1996 Bible

Kwetsembeka kwaNkulunkulu esiveni sakhe lesingaketsembeki

Imaskili ya-Asafa.

¹ Hhawu, sive sami! Lalelani imfundziso yami, nibeke indlebe emavini ami.

² Ngitawufundzisa ngemifanekiso, ngikhulume imfihlakalo yasemandvulo.

³ Tindzaba lesake sativa satati, ngekutekelwa bokhokho betfu,

⁴ natsi siyawutitekela batukulu betfu, sitjele titukulwane letitako, sitifundzise imisebenti yebukhosi, kanye nemandla aSimakadze, kanye netimangaliso latentile.

⁵ Wamisa bufakazi kubakaJakobe, washaya umtsetfo esiveni saka-Israyeli; wayala ngawo bokhokho betfu kutsi bawufundzise bantfwababo,

⁶ kuze nesitukulwane lesilandzelako siwati, nebatukulu babo labasetawutalwa, nabo bakhule batjela bantfwababo.

⁷ Litsemba labo batawulibeka kuNkulunkulu, kuze bangayikhohlwa imisebenti yaNkulunkulu, kepha bagcine imiyalo yakhe;

⁸ bangenti njengobe kwenta bokhokho lekwakusitukulwane lesinenkhani nalesihlubukako, situkulwane lesite inhlitiyo lenebucotfo, nalesasinemoya longaketsembeki kuSomandla.

⁹ Baka-Efrayimu lababehlome butjoki babaleka, mhlazana ibambene ngetihlutfu.

¹⁰ Abasigcinanga sivumelwane saNkulunkulu, bala kuhamba ngemtsetfo wakhe.

¹¹ Bakhohlwa ngimisebenti layentile netimangaliso takhe labakhombisa tona.

¹² Wenta timangaliso embikwabokhokho babo, endzaweni yaseSowani eveni laseGibhithe.

¹³ Wehlukanisa lwandle, wabeweta kulo, wemisa emanti, kwaba shangatsi tindvonga.

¹⁴ Emini abebahola ngelifu, kutsi ebusuku abahole ngemlilo.

¹⁵ Wacheketa emadvwala ehlane, wabanatsisa badzimate bakholwa.

¹⁶ Wamilisa imifula edvwaleni, wageletisa emanti shangatsi ngimifula.

¹⁷ Noko, bachubeka nekumona, bamhlubuka ehlane Losetikwako Konkhe.

¹⁸ Nkulunkulu bamlinga etinhlitiyweni tabo ngekumfuna kudla lababekufisa.

¹⁹ Bakhuluma kabi ngaNkulunkulu batsi: “Nkulunkulu angasondla yini lapha ehlane?

²⁰ Washaya lidvwala kwageleta emanti, imifula yagcwala, yaphuphuma. Pho, angasipha yini kudla alungiselele sive sakhe inyama?”

²¹ Ngako-ke watsi Simakadze nakuva loko watfukutsela, kwavutsa umlilo wadla bakaJakobe, intfukutselo yakhe yabavutsela bakaJakobe,

²² ngobe babengakholwa kuNkulunkulu, bangete bawetsemba emandla akhe lasindzisako.

²³ Wabe sewuyala tibhakabhaka etulu, lizulu lavula iminyango,

²⁴ wanisa imana kutsi bantfu badle, wabapha emabele asezulwini.

²⁵ Bantfu badla sinkhwa setingilosi, wabanika kudla lokwenele.

²⁶ Wenta umoya wemphumalanga kutsi uphephetse emazulwini, emandla akhe abuyisa umoya waseningizimu.

²⁷ Wanisa inyama yaba ngangelutfuli, tinyoni taba ngangetihlabatsi tetilwandle.

²⁸ Lenyama wayinisa emkhatsini wemathende abo, nasemaceleni kwemathende abo.

²⁹ Badla bashaya sentfwala, ngobe abebaphe loko babekuhalela.

³⁰ Kodvwa kwatsi basengakeneliseki ebudlini babo, kudla kusagcwele imilomo yabo,

³¹ Nkulunkulu wabavukela ngelulaka, wabulala bonkhe lababenemandla babo, wagicita phansi emajaha aka-Israyeli.

³² Etikwako konkhe loku bajinge bachubeka nekona kwabo, abazange bakholwe netimangaliso takhe.

³³ Ngako wenta kutsi emalanga abo endlule ashabalale njengemoya, neminyaka yabo yacedvwa tehlakalo.

³⁴ Ngesikhatsi ababhubhisa babetiletsa kuye, baphendvuke bafunisise Nkulunkulu.

³⁵ Bakhumbula kutsi Nkulunkulu ulidvwala labo, Nkulunkulu Losetikwako Konkhe ungumhlengi wabo.

³⁶ Kodvwa babencempheta ngemilomo yabo, bacala emanga kuye ngetilwimi tabo,

³⁷ inhlitiyo yabo yayingakemi kuye, bangaketsembeki evini lesivumelwane naye.

³⁸ Kodvwa yena waba nesihawu, watisibekela tono tabo, akazange ababhubhise abacedze. Kanyenti watibamba ekutfukutseleni kwakhe, akaluvusanga lonkhe lulaka lwakhe.

³⁹ Wakhumbula kutsi batidalwa letabunjwa ngenyama, banjengemoya lotsi hasha, uhambe siphelane.

⁴⁰ Kukanyenti kangakanani bamhlubuka ehlane, bamdzabukisa ehlane kalashameshame.

⁴¹ Balinga Nkulunkulu njalonjalo, bacansula Longcwele waka-Israyeli.

⁴² Babengayikhumbuli imisebenti yemandla akhe, nelilanga mhlazana abahlenga esitseni,

⁴³ ngesikhatsi enta tibonakaliso takhe eGibhithe, enta netimangaliso takhe eveni laseSowani.

⁴⁴ Imifula yabo wayigucula yaba yingati, ngako behluleka kunatsa kuyo lemifula.

⁴⁵ Wabatfumelela emabulo etibawu, tabaluma, kanye neticoco letaba yimbhubhiso leluhlupho.

⁴⁶ Watfumela tintsetse, tacedza tilimo tabo, sikhonyane sadla titfukutfuku tabo.

⁴⁷ Wavitsita imivini yabo ngesangcotfo, washaya nemikhiwane yabo ngesitfwatfwa.

⁴⁸ Wanikela tinkhomo tabo ngesangcotfo, netimvu tabo ngemibane.

⁴⁹ Watfukulula intfukutselo yakhe levutsako, lulaka, nentfukutselo, neluhlupho, nesishoshomane setitfunywa temashwa.

⁵⁰ Wadedela lulaka lwakhe, wangete walubamba, wangete wawuphephisa umphefumulo wabo ekufeni, kodvwa timphilo tabo watinikela ngetifo letibulalanako.

⁵¹ Wabulala onkhe ematubulo aseGibhithe, lekwakungumgogodla wemphi emathendeni aHhamu.

⁵² Kepha wakhipha sive sakhe njengetimvu, wasihola ehlane njengemhlambi wakhe.

⁵³ Wabahola baphepha bangesabi lutfo, kepha lwandle lwatimbonya titsa tabo.

⁵⁴ Wabayisa eveni lakhe lelingcwele, letintsaba, lalitfola ngesandla sakhe sekudla.

⁵⁵ Wacosha tive embikwabo, lelive walenta laba lifa labo, lapho imindeni yaka-Israyeli yayingamisa khona emathende ayo.

⁵⁶ Noko bamlinga bamhlubuka Nkulunkulu Losetikwako Konkhe, bangete bayigcina imiyalo yakhe.

⁵⁷ Benta bucili, bahlubuka, njengabokhokho babo, bajikajika njengesigwegwe sebutjoki.

⁵⁸ Bamtfukutselisa ngetindzawo tabo temalati, lapho bakhonta khona tithico tabo letibatiwe, loko kwamenta waba nesikhwele.

⁵⁹ Watsi nakuva loko Nkulunkulu, watfukutsela, wabalahla baka-Israyeli.

⁶⁰ Wayidzikila indlu yakhe lengcwele leseShilo, lithende labehlala kulo emkhatsini webantfu,

⁶¹ wayekelela titsa, tatfumba libhokisi lesivumelwane lelisiboniso semandla nenkhatimulo yakhe.

⁶² Sive sakhe wasinikela enkembeni, walitfukutselela lifa lakhe.

⁶³ Emajaha abo acotfulwa ngumlilo, tintfombi tabo tandzindza lababengatiteka.

⁶⁴ Baphristi babo baba kudla kwenkemba, bafelokati babo abazange babalilele.

⁶⁵ Simakadze, Nkulunkulu, wavuka, njengalophaphama ebutfongweni, nanjengesichwaga lebesesehlulwe tjwala.

⁶⁶ Watehlula watihlehlisela nyova titsa takhe, watitsela ngelihlazo laphakadze.

⁶⁷ Wawufulatsela umndeni wakaJosefa, wangete wasikhetsa sive saka-Efrayimu.

⁶⁸ Kepha wakhetsa sive sakaJuda, iNtsaba iSiyoni, labeyitsandza kakhulu.

⁶⁹ Wayakha indlu yakhe lengcwele, leyayiphakeme kakhulu njengemhlaba lawusekela, kuze kube phakadze naphakadze.

⁷⁰ Wakhetsa Davide, inceku yakhe, wamlandza ekweluseni timvu,

⁷¹ nasekunakekeleni timvukati nemazinyane ato, kutsi atekwelusa bakaJakobe, sive sakhe, yebo, baka-Israyeli labalifa lakhe.

⁷² Wabelusa ngebucotfo benhlitiyo, wabahola ngenhlakanipho nangebungcweti besandla sakhe.