Tihlabelelo 77 - Siswati 1996 Bible

Umthandazo walosekuhluphekeni

Sihlabelelo sa-Asafa lesetfulwe kutsi sihlatjelwe ngendlela yaJeduthuni.

¹ Ngakhala kuNkulunkulu, ngakhala kuye, kuze atengiva.

² Nangiselusizini ngifuna Simakadze, nasebusuku ngiphakamisa tandla tami, ngikhuleke ngingadzinwa, umphefumulo wami wale kudvudvuteka.

³ Ngiyamkhumbula Nkulunkulu bese ngiyabubula; ngiyacabangisisa, bese umoya wami uphelelwa ngemandla. Cabanga.

⁴ Nguwe lowenta tinkhophe tami kutsi tingasindvwa butfongo, ngehluleka ngisho nekukhuluma.

⁵ Ngicabanga ngemalanga asemandvulo, ngikhumbule iminyaka yakadzenidzeni.

⁶ Ngikhumbula kushaya ihabhu yami, ngizindle ngayo enhlitiyweni yami ebusuku, umoya wami ucabangisisa ubute utsi:

⁷ “Kantsi Simakadze utangilahla siphelane yini? Angeke yini aphindze abe nemusa nesihawu?

⁸ Umusa wakhe longagucuki sewuphele siphelane yini? Kungabe lesetsembiso sakhe siphelile yini etitukulwaneni ngetitukulwane?

⁹ Nkulunkulu sewukhohliwe yini kuba nemusa? Kungabe kutfukutsela kwakhe kumente wagodla bubele bakhe yini?” Cabanga.

¹⁰ Ngibese ngitsi: “Naku lokungihluphako: Sandla sangesekudla saLosetikwako Konkhe sesijikile.”

¹¹ Yebo, Simakadze, ngitase ngikhumbule imisebenti yaNkulunkulu, yebo, ngikhumbule netimangaliso takho tasendvulo.

¹² Ngitawucabangisisa ngawo wonkhe umsebenti wakho, ngijinge ngicabange ngemisebenti yakho yemandla.

¹³ Yebo, Nkulunkulu, indlela yakho ingcwele, ngumuphi nkulunkulu longuSomandla njengaNkulunkulu wetfu?

¹⁴ UnguNkulunkulu lowenta timanga, lobonakalise emandla akhe emkhatsini wetive.

¹⁵ Wasihlenga ngengalo yakho sive sakho lesasibatukulu baJakobe naJosefa. Cabanga.

¹⁶ Emanti atsi kube abone wena, Nkulunkulu, atfutfumela, netinjolobela telwandle tachachatela.

¹⁷ Emafu atsela imvula, tibhakabhaka tadvuma taklaklabula, kwaklwebha imicibisholo yemibane ndzawana tonkhana.

¹⁸ Siphepho sasinemsindvo wekudvuma, kwaphambana imibane, kwakhanya umhlaba, umhlaba wagidzitela watamatama.

¹⁹ Indlela yakho yadzabula lwandle, umvila wakho uselwandle lolujulile, noko tinyatselo takho tatingabonakali.

²⁰ Sive sakho wasihola njengetimvu, ngesandla saboMosi na-Aroni.