Tihlabelelo 76 - Siswati 1996 Bible

Nkulunkulu ngumncobi nemehluleli

Sihlabelelo lesiyingoma ya-Asafa. Setfulwe kumhlabelisi kutsi sihlatjelwe ngetingubhu letinetintsambo.

¹ Nkulunkulu uyatiwa kaJuda, libito lakhe likhulu ka-Israyeli.

² Lithende lakhe liseSalema, nendlu yakhe iseSiyoni.

³ Ngulapho ephula khona imicibisholo levutsako, sihlangu, inkemba, kanye netikhali temphi. Cabanga.

⁴ Maye, kukhanya kwakho kuyakhatimula! Ukhatimula kwendlula tintsaba letivunule kahle.

⁵ Emachawe latatisako asaphangwe imphango yawo, adzimate efikelwa butfongo alala siphelane; onkhe ehlulekile kusebentisa tandla tawo.

⁶ Ngesikhahlo sakho, Nkulunkulu waJakobe, bagibeli nemahhashi behlelwe butfongo.

⁷ Kodvwa uyesabeka, ngubani nje longema embikwakho, nase utfukutsele uvutsa lulaka?

⁸ Usesemazulwini wevakalisa kwehlulela kwakho, umhlaba wesaba, wathula,

⁹ mhlazana Nkulunkulu atekwehlulela, kuze asindzise bonkhe labatfobekile bemhlaba. Cabanga.

¹⁰ Ngempela lulaka lwebantfu lwengeta indvumiso yakho, labasindze elulakeni lwakho bayimvunulo yakho.

¹¹ Yentani tetsembiso netifungo tenu kuSimakadze longuNkulunkulu wenu, nitigcwalise. Bonkhe labasedvute naye abaletse tipho kulowo lofanele kwesatjwa.

¹² Nguye lotfobisa tikhulu, uyesabeka emakhosini emhlaba.