Tihlabelelo 75 - Siswati 1996 Bible

Nkulunkulu utfobisa lomubi aphakamise lolungile

Sihlabelelo sa-Asafa lesiyingoma leyetfulwe kumhlabelisi kutsi ihlatjelwe ngendlela letsi: “Ungabhubhisi.”

¹ Siyakudvumisa, Nkulunkulu, siyakudvumisa, wena usedvutane nasibita libito lakho, sibalise ngemisebenti yakho lemangalisako.

² Wena ukhuluma utsi: “Nakufika sikhatsi lesimisiwe sekwehlulelwa, mine ngiyakwehlulela ngebucotfo.

³ Nome umhlaba sewutanyatanyiswa, kanye nabo bonkhe labahlala kuwo, mine ngisimisa tinsika tawo. Cabanga.

⁴ “Kulabatigcabhako ngitsite: ‘Ningatigcabhi!’ Kulababi ngatsi: ‘Ningatiphakamisi!

⁵ Ningatiphakamisi nitikhukhumete, ningakhulumi ngekwedzelela!’ ”

⁶ Ngobe kuphakama nekwehla kwemuntfu akuveli emphumalanga nome enshonalanga, akuveli ngisho nasehlane nasetintsabeni;

⁷ kodvwa nguNkulunkulu lowehlulelako, wehlisa lomunye aphakamise lomunye.

⁸ Ngobe esandleni saSimakadze kunendzebe, leneliwayini lelibile laze laloya; ulinatsisa bonkhe lababi bemhlaba baliminyele, ngisho nenseketse yalo.

⁹ Kepha mine ngiyawujabula kuze kube phakadze, ngidvumise Nkulunkulu waJakobe.

¹⁰ Nkulunkulu utsi: “Ngiyawubehlisa bonkhe lababi, ngiphakamise bonkhe labalungile.”