Tihlabelelo 74 - Siswati 1996 Bible

Umkhuleko wekukhululwa kwesive

Imaskili ya-Asafa.

¹ Awu, Nkulunkulu! Usilahleleni sive sakho siphelane? Intfukutselo yakho ibhunyeleleni timvu telidlelo lakho?

² Khumbula libandla lakho lowatikhetsela lona kwasemandvulweni, walihlenga kutsi libe sive lesilifa lakho. Khumbula iNtsaba iSiyoni, lapho wawuhlala khona.

³ Yelulela tinyawo takho ekudzilitweni kwaphakadze, sitsa sibhidlite konkhe endlini lengcwele!

⁴ Titsa takho tibhodle endzaweni yekukhontela, temisa tiboniso tato letikhombisa kuncoba.

⁵ Tabukeka shangatsi bantfu bayagawula, bageca dukathole welihlatsi ngemazembe.

⁶ Titsa setibhidlite ngemazembe nangemigcala konkhe lokubatiwe lokusendzaweni lengcwele.

⁷ Indlu yakho lengcwele tiyokhele ngemlilo, tayingcolisa lendzawo yelibito lakho, tayidzilita tacotfula imbokodvo nesisekelo.

⁸ Tatsi etinhlitiyweni tato: “Asibacedze nya!” Tishise tonkhe tindzawo, lapho kukhontelwa Nkulunkulu khona.

⁹ Tibonakaliso tenkholo yetfu asisatiboni, sekute ngisho nemphrofethi, kute ngisho nalapha emkhatsini wetfu lowatiko kutsi kuyawudzimate kube ngunini.

¹⁰ Awu, Nkulunkulu! Kuyawudzimate kube ngunini sitsa sikuhlambalata? Sitsa sakho sifanele yini kwetfuka libito lakho kuze kube phakadze?

¹¹ Usigodlelani sandla sakho sangesekudla? Sikhiphe esifubeni sakho ubacitse.

¹² Noko wena, Nkulunkulu, uyiNkhosi yami kwasemandvulweni; nguwe lowenta insindziso emhlabeni.

¹³ Nguwe lowehlukanisa lwandle ngemandla akho, nguwe lowafohlota tilwane letinkhulu taselwandle.

¹⁴ Nguwe lowapitjita tinhloko taLeviyathani, wamenta waba kudla kwetidalwa tasehlane.

¹⁵ Nguwe lowavula tiyalu nemifula emadvwaleni, womisa nemifula legeletako.

¹⁶ Imini yakho, nebusuku bakho, nguwe lowenta kukhanya nelilanga.

¹⁷ Nguwe lowenta yonkhe iminyele yemhlaba, nguwe lowenta lihlobo nebusika.

¹⁸ Khumbula-ke, Simakadze, kutsi sitsa sikwetfukile sikuhlambalatile. Sive lesilibele silihlambalatile libito lakho.

¹⁹ Ungaliyekeleli lijubantsendzele lakho kutsi lidliwe tilwane tesiganga; ungasikhohlwa siphelane sive sakho lesicindzetelwe.

²⁰ Khumbula sivumelwane lowasenta natsi, ngobe tonkhe tindzawo letinematfunti lapha eveni tigcwele budlova.

²¹ Ungavumi kutsi labacindzetelwe bancandzeke bahlazekile; labamphofu nalabeswele abadvumise libito lakho.

²² Phutfuma, Nkulunkulu, utiphendvulele, ukhumbule labo labalibele, kutsi bakwetfuka imihla nemalanga.

²³ Ungawukhohlwa umsindvo wetitsa takho, nekucokotela kwalabakuvukelako kutsi kuya ngekwandza njalo nje.