Tihlabelelo 72 - Siswati 1996 Bible

Kubusa kwenkhosi lelungile

Sihlabelelo saSolomoni.

¹ Awu, Nkulunkulu! Nika inkhosi likhono lakho lekwehlulela nekubusa ngebucotfo unike lomntfwanenkhosi kulunga kwakho.

² Shangatsi ingehlulela sive sakho ngekulunga, nalabamphofu ibaphatse ngebucotfo.

³ Tintsaba tiyawuletsa kuthula kubantfu, kanjalo nemagcuma kuchuma kwekulunga.

⁴ Shangatsi ingabavikela bantfu labatimphofana, ikhulule labeswele, ipitjite bacindzeteli!

⁵ Shangatsi bangesaba wena, bakwesabe emini kukhanya lilanga, bakwesabe nome sekukhanya inyanga, titukulwane ngetitukulwane.

⁶ Shangatsi inkhosi ungayenta ibe njengemvula nayehlela emadlelweni, nanjengemvula nayinisela umhlabatsi.

⁷ Shangatsi ngemalanga ayo kungandza kulunga, kwandze nekuthula siphelane.

⁸ Shangatsi bukhosi bayo bungagcwala umhlaba, busuke elwandle buye bufike elwandle lolunye; busuke eMfuleni, buze bufike ekugcineni kwemhlaba.

⁹ Shangatsi tive letihlala ehlane tingakhotsama embikwayo, netitsa tayo tiyikhotsamele.

¹⁰ Shangatsi emakhosi aseThashishi nasetichingini, angetfula tipho kuyo. Shangatsi emakhosi aseSheba newaseSeba angetfula kuyo imitselo yawo.

¹¹ Shangatsi onkhe emakhosi angakhotsama kuyo, netive tonkhe tiyikhonte.

¹² Iyamkhulula loyibitako, naloweswele, nalomphofu, nalote umsiti.

¹³ Inesihe kulababutsakatsaka nalabeswele, isindzise kuphila kwalabeswele.

¹⁴ Ikhulula kuphila kwalabo labasekubandzetelweni nasebudloveni, ingati yabo iligugu emehlweni ayo.

¹⁵ Shangatsi ingakhula idzimate ikhokhobe, iphiwe negolide yaseSheba. Shangatsi ingathandazelwa njalonjalo, icelelwe tibusiso taNkulunkulu ngato tonkhe tikhatsi.

¹⁶ Shangatsi kungaba nenala emasimini, lenala isibekele ticongo tetintsaba, kube tiphihli, sincane setihlahla taseLebanoni. Shangatsi lamadolobha angagcwala bantfu, babe ngangetjani.

¹⁷ Shangatsi libito layo lingahlala ingunaphakadze, lichubeke latiwe njengelilanga. Tive tonkhe atibusiswe ngayo; tiyawumbita ngekutsi yinkhosi lebusisekile.

¹⁸ Akabongwe Simakadze, Nkulunkulu, nguye longuNkulunkulu wema-Israyeli, nguye yedvwa lowenta timangaliso.

¹⁹ Alibongwe libito lakhe lenkhatimulo, libongwe kuze kube phakadze, shangatsi umhlaba wonkhe ungagcwala inkhatimulo yakhe. Amen! Yebo, Amen!

²⁰ Siphetfo semithandazo yaDavide, umsa waJese.