Tihlabelelo 69 - Siswati 1996 Bible

Kukhala kwemuntfu loselusizini

Sihlabelelo saDavide lesetfulwe kumhlabelisi kutsi sihlatjelwe ngendlela letsi: “Siphephane.”

¹ Ngisindzise, Nkulunkulu, ngobe emanti asaze efika entsanyeni.

² Ngiyabisha elubishini lweludzaka, kute nalapho ngisima khona ngelunyawo, sengize ngefika la kushona khona kakhulu, tikhukhula setitangisibekela.

³ Ngidvubuteke kabi ngenca yekukhala kwami, umphimbo wami womile, uyahoshota. Emehlo ami asacundzekile ngenca yekulindzela wena, Nkulunkulu wami.

⁴ Banyenti kunetinwele tenhloko yami badlanga ngemandla labafuna kungibulala, labo labangitondza ngelite. Ngiphocelelwani kutsi ngikhishiswe intfo lengingakayebi?

⁵ Yebo, Nkulunkulu, wena uyabati bulima bami, netono tami atikafihleki kuwe.

⁶ Shangatsi labo labetsembele kuwe bangete behlelwa ngemahloni bajabhiswe ngenca yami. Hhawu, Simakadze, Nkulunkulu wemabandla, shangatsi labo labafuna wena bangete bahlazeka, badvumale ngenca yami, Nkulunkulu wema-Israyeli.

⁷ Ngobe ngetfwele lihlazo ngenca yakho, buso bami sebumbonywe ngemahloni.

⁸ Sengingumfokati emkhatsini wabomnaketfu, ngingumchamuki nakubantfwana baketfu.

⁹ Ngidliwa kushisekela indlu yakho, tinhlamba talabakwetfukako tehlela etikwami.

¹⁰ Ngakhala emphefumulweni wami, ngazila, kwaba yinhlamba labangetfuka ngayo.

¹¹ Inzilo yaba sembatfo sami, ngagucuka ngaba yinhlekisa kubo.

¹² Ngiyindzabamlonyeni kulabahlala emasangweni; tidzakwa tihlabela tigiye ngami.

¹³ Kodvwa mine lo, umthandazo wami uta kuwe, Simakadze, ngesikhatsi lesifanele, Nkulunkulu; ngiphendvule ngebukhulu bemusa wakho nesetsembiso sakho sekungisindzisa.

¹⁴ Ngitatulule kuloludzaka lengibisha kulo, ngisindzise kulabo labangitondzako, ungimonyule nasesitibeni lesishonako.

¹⁵ Ungativumeli tikhukhula temanti kutsi tingemukise, ungawavumeli emanti kutsi angimite, ungawuvumeli nemgodzi kutsi ungigwinye.

¹⁶ Ngiphendvule, Simakadze, ngobe umusa wakho muhle, gucukela kimi ngemusa wakho lomkhulu.

¹⁷ Ungayifihleli buso bakho inceku yakho, ngobe ngisebunzimeni, phutfuma ungiphendvule.

¹⁸ Sondzela emphefumulweni wami, uwuhlenge, ngephule ngobe titsa tami tinyenti.

¹⁹ Wena uyakwati kucoloshelwa kwami, nekuhlazeka kwami, ngehlelwa ngemahloni; tonkhe titsa tami tisembikwakho.

²⁰ Kuhlanjalatwa kuwephulile umphefumulo wami, ngadzimate ngaphelelwa nangemandla. Ngacalata ngifuna longangihawukela, kodvwa kwabate lengimbonako. Ngacalata ngifuna nebadvudvuti, nakhona kwabate lengibabonako.

²¹ Bangiphakela inyongo esikhundleni sekudla; ekomeni kwami banginatsisa liwayini lelimunyu.

²² Shangatsi lidzili labo lingaba lugibe kubo, shangatsi inhlalakahle yabo ingaba ngusochaka kubo.

²³ Shangatsi emehlo abo angafiphatwa, bangete babona, netinyonga tabo ticeke siphelane.

²⁴ Tfululela intfukutselo yakho etikwabo, ubavimbetele ngelulaka lwakho loluvutsako.

²⁵ Shangatsi imiti yabo ingacitseka, kubete lohlala emathendeni abo.

²⁶ Ngobe lowo loshaywe nguwe bayamtingela bamhluphe, bakhuluma ngebuhlungu balabo labalinyatwe nguwe,

²⁷ bengetele sijeziso etikwekona kwabo, ungabavumeli kutsi bangene ekulungeni kwakho.

²⁸ Abesulwe encwadzini yekuphila, bangabhaliswa ndzawonye nalabalungile.

²⁹ Kepha mine ngiselusizini lwetinhlungu. Insindziso yakho, Nkulunkulu, ayingilondvolote, ingigcine endzaweni lephakeme.

³⁰ Libito laNkulunkulu ngiyawulibonga ngemusa, ngimphakamise ngekumbonga.

³¹ Loko Simakadze ukutsandza kakhulu kunekunikela ngenkunzana, ngisho nangesibheva senkunzi lenetimphondvo nemasondvo.

³² Labatfobekile bayawubona bajabule, nine lenifuna Nkulunkulu tinhlitiyo tenu ativuseleleke.

³³ Simakadze uyabeva labamphofu, lababoshiwe bakhe akabadzeli.

³⁴ Akadvunyiswe lizulu, nemhlaba netilwandle, nako konkhe lokuphila kuko.

³⁵ Ngobe Nkulunkulu uyawuyisindzisa iSiyoni, akhe kabusha emadolobha akaJuda, bayawuhlala kuleyo ndzawo ibe yabo.

³⁶ Titukulwane tetinceku takhe tiyawuyidla ibe lifa lato, nalabo labatsandza libito laNkulunkulu bayawuhlala kuyo.