Tihlabelelo 68 - Siswati 1996 Bible

Nkulunkulu wema-Israyeli wephana ngekuncoba

Sihlabelelo saDavide lesiyingoma leyetfulwe kumhlabelisi.

¹ Nkulunkulu nakasukuma, titsa takhe tiyasakateka, labamtondzako babaleke embikwakhe.

² Bayaphephuka njengekupheshulwa kwentfutfu, bayancibilika njengemtfwebeba nawuseceleni kwemlilo. Bacitfwa kanjalo-ke lababi embikwaNkulunkulu.

³ Kepha labalungile bayajabula betsabe embikwaNkulunkulu, bajabula nekujabula.

⁴ Hlabelani kuNkulunkulu, nidvumise libito lakhe. Nimlungiselele umgwaco, yena lodzabula ematsafa elugwadvule; nguSimakadze libito lakhe, nihlabele ngenjabulo embikwakhe!

⁵ Nguye uyise wetintsandzane, nemlondvoloti webafelokati, unguNkulunkulu losendzaweni yakhe lengcwele.

⁶ Nkulunkulu upha imihambima emakhaya lapho ingahlala khona, lababoshiwe abaholele ekubuseni, kodvwa labaphika inkhani ubahlalisa ehlane.

⁷ Nkulunkulu! Ekuphumeni kwakho nawuhola sive sakho, udzabula naso ehlane, Cabanga.

⁸ umhlaba watamatama, emazulu antfontsa imvula, embikwaNkulunkulu, entsabeni yaseSinayi, ngesikhatsi kuta wena, Nkulunkulu, Nkulunkulu wema-Israyeli.

⁹ Wanisa imvula lenkhulu, Nkulunkulu, wahlumisa live lakho lelase ligagadzekile.

¹⁰ Sive sakho sakha emakhaya aso kulo, ngebuhle bakho, Nkulunkulu, uyabalungisela labeswele.

¹¹ Simakadze wakhipha umyalo wakhe. Sicumbi lesikhulu salabasikati saphuma salilitela satsi:

¹² “Emakhosi etimphi ayabaleka nekubaleka.” Labasikati emakhaya bebasehlukaniselana imphango,

¹³ ngesikhatsi emadvodza asaphumula etibayeni. Imphango bekulituba lelinetimphiko tesiliva, tinsiba tiyigolide lecwebetelako.

¹⁴ Ngesikhatsi Somandla advungulula emakhosi lalikhitsika entsabeni iSalmoni.

¹⁵ Uyintsaba yaSomandla, wena ntsaba yaseBhashani! Uyintsaba leneticongo letinyenti, wena ntsaba yaseBhashani!

¹⁶ Wena ntsaba leneticongo letinyenti, uyibukelani ngeliso lelibi lemona, lentsaba lekhetfwe nguNkulunkulu, watsandza kutsi ibe likhaya lakhe? Simakadze uyawuhlala kulo kuze kube phakadze.

¹⁷ Tincola taNkulunkulu titinkhulungwane letingemashumi netinkhulungwane ngetinkhulungwane, Simakadze usemkhatsini wato ngebukhosi bakhe lobunjengebungcwele baseSinayi.

¹⁸ Wena, Simakadze, wenyukela entsabeni lendze, watfumba labanyenti labatfunjiwe, wemukele tipho kubantfu, watemukela ngisho nakubo labamelene nawe, kuze uhlale khona wena, Simakadze.

¹⁹ Akadvunyiswe Simakadze, ngobe usitfwalela imitfwalo yetfu onkhe emalanga, nguNkulunkulu loyinsindziso yetfu. Cabanga.

²⁰ Nkulunkulu, longuNkulunkulu wetfu, unguNkulunkulu wensindziso, emandla ekubalekela kufa ngewaSimakadze iNkhosi.

²¹ Empeleni, Nkulunkulu uyawutiphohlota, tinhloko tetitsa takhe, aphihlite netinkhakhayi talabaphikelela etonweni.

²² Simakadze wakhuluma watsi: “Titsa takho ngiyawutibuyisa naseBhashani, ngibuyise naletisekujuleni kwelwandle,

²³ kuze tinyawo takho tibhocote engatini yetitsa tenu, netinja takho tibe nesabelo ekudleni lengati yetitsa takho.”

²⁴ Yebo, Nkulunkulu! Tibonwa ngibo bonkhe letindvwendvwe takho, ticondze endlini lengcwele, tindvwendvwe taNkulunkulu wami, iNkhosi yami.

²⁵ Tiholwa ngulabahlabelako, emuva kugcine labashaya tingubhu letinetintsambo, emkhatsini wabo kuhamba tintfombi, letishaya bokhencekhence, titsi:

²⁶ “Bongani Nkulunkulu emikhambatsini nidvumise Simakadze, nine beluhlanga lwaka-Israyeli.”

²⁷ Nango Bhenjamini litfunjana, abahola, tikhulu takaJuda tiyincumbi, nati netikhulu takaZebuloni netakaNaftali.

²⁸ Veta emandla akho, Nkulunkulu! Sibonise emandla akho, Nkulunkulu, lawo mandla lowawabonakalisa kitsi

²⁹ ngesikhatsi usethempelini lakho, eJerusalema, emakhosi atakuletsela tipho takho khona.

³⁰ Sekhute lesilwane semhlanga, iGibhithe, uwekhute nalomhlambi wetinkunzi losemkhatsini wematfole etive. Bayagcobagcobana, babange imali, basakate leto tive, bajatjuliswe kususa lutfutfuva lwemphi.

³¹ Emancusa ayawuvela eGibhithe, naKushe atinikele kuNkulunkulu.

³² Hlabelani kuNkulunkulu, nine mibuso yemhlaba, hlabelani nidvumise Simakadze. Cabanga.

³³ Simakadze ugibela emazulu, wona lawo mazulu asendvulo. Yena uvakalisa liphimbo lelivi lakhe, lona liliphimbo lelinemandla.

³⁴ Memetelani emandla aNkulunkulu, bukhosi bakhe bengamele sive saka-Israyeli, nemandla akhe asetulu esibhakabhakeni.

³⁵ Uyesabeka, Nkulunkulu, endzaweni yakho lengcwele. Nkulunkulu wema-Israyeli, nguwe lonika bantfu emandla nekucina. Akadvunyiswe Nkulunkulu!