Tihlabelelo 66 - Siswati 1996 Bible

Kudvumisa imisebenti lemikhulu yaNkulunkulu

Sihlabelelo lesiyingoma; lesetfulwe kumhlabelisi.

¹ Hlokoma, ye mhlaba wonkhe! Dvumisa Nkulunkulu.

² Hlabelelani nituse libito lakhe, nidvumise bukhosi bakhe.

³ Khulumani kuNkulunkulu nitsi: “Maye, imisebenti yakho mikhulu iyesabeka. Titsa takho titawuta kuwe tikhasa ngemadvolo, ngenca yemandla akho lamakhulu.

⁴ Bonkhe bantfu bemhlaba bayawukhuleka kuwe bakudvumise; bayawuhlabela badvumise libito lakho.” Cabanga.

⁵ Wotani nitewubona lokwentiwe nguNkulunkulu, wente lokwesabekako emkhatsini webantfu.

⁶ Lwandle walugucula lwaba ngumhlabatsi lowomile, bokhokho bewela umfula ngetinyawo. Wotani sijabule kuye.

⁷ Nguye lobusa ngemandla kuze kube phakadze. Emehlo akhe ahlala alindze tive, labo labanenkhani abangatikhukhumeti. Cabanga.

⁸ Mbongeni Nkulunkulu wetfu, nine tive, vakalisani ludvumo lwakhe.

⁹ Nguye logcina umphefumulo wetfu uphilile, akativumeli tinyawo tetfu kutsi tishelele.

¹⁰ Wena Nkulunkulu, usivivinyile, usihlambulule ngekusicenga njengekucengwa kwesiliva emlilweni.

¹¹ Wasiholela kutsi sibanjwe elugibeni, wasetfwesa umtfwalo lomatima.

¹² Wenta kutsi bantfu bagibele etikwetinhloko tetfu, sangena emlilweni nasemantini, wabuye wasikhuphulela enaleni.

¹³ Ngiyawungena endlini yakho ngineminikelo yekushiswa; ngigcwalise tetsembiso tami kuwe,

¹⁴ leto lengatikhuluma ngemlomo wami, mhlazana ngisekuhluphekeni.

¹⁵ Ngiyawunikela iminikelo yekushiswa yetifuyo letikhuluphele; nginikele ngelusi lwetincama, nangetinkunzi netiphongo. Cabanga.

¹⁶ Wotani nonkhe nitewuva, nonkhe nine lenesaba Nkulunkulu, ngitanitjela ngako konkhe langentele kona.

¹⁷ Ngakhala kuye ngemlomo wami kudvumisa yena kwakuselulwimini lwami.

¹⁸ Kube bengicondze bubi enhlitiyweni yami, Simakadze abengeke angive.

¹⁹ Ngempela, Nkulunkulu uvile, walilalela livi lemthandazo wami.

²⁰ Akabongwe Nkulunkulu longazange awulahle umthandazo wami, nalongawugodlanga umusa wakhe kimi.