Tihlabelelo 65 - Siswati 1996 Bible

Kubonga Nkulunkulu ngemvelo

Sihlabelelo lesiyingoma yaDavide; lesetfulwe kumhlabelisi.

¹ Yebo Nkulunkulu, lukufanele ludvumo eSiyoni, tetsembiso tetfu kufanele tigcwaliseke kuwe.

² Wena uva imithandazo uyiphendvule; bonkhe bantfu bafanele kuta kuwe

³ ngenca yetono tabo. Ngesikhatsi tiphambuko tetfu tisehlula nguwe lositsetselelako.

⁴ Ubusisiwe umuntfu lokhetfwa nguwe umsondzete kuwe, uyawuhlala endzaweni yakho lengcwele. Siyakwesutsiswa ngalokuhle kwendlu yakho, lithempeli lakho lelingcwele!

⁵ Usiphendvule ngemisebenti lemangalisako, wena Sokulunga; wena unguNkulunkulu wensindziso yetfu. Bonkhe bantfu emhlabeni wonkhe, nangesheya kwetilwandle, betsembele kuwe.

⁶ Wena lowamisa tintsaba ngemandla akho, watimisa uvunule emandla.

⁷ Ubindzisa kudvuma kwetilwandle, uthulise kugubha nekuhlokoma kwemagagasi, ubindzise siphitsiphitsi lesicokotelisa tive.

⁸ Ngako bonkhe bantfu emhlabeni wonkhe bayawutfutfumela ngenca yetibonakaliso takho; tento takho tiletse kujabula lokukhulu, emini nasebusuku, emhlabeni wonkhe jikelele.

⁹ Unakekela umhlaba ngekuwupha inala, uwuvundzise kakhulu. Umfula waNkulunkulu ugcwele emanti. Bantfu ubapha emabele. Loku ukwenta kanje:

¹⁰ Unisa imvula leyenele emasimini, udvubadvube emagadze awo; utsambise umhlabatsi ngemvula, ubusise nalokukhula kuwo.

¹¹ Uhlobisa umnyaka ngetipho takho, lapho uhambe khona kulandzele inala.

¹² Emadlelo elihlane ahlume luhlata, emagcuma avunule injabulo,

¹³ emadlelo embeswe yimihlambi, tifundza tibe bovu tju emabele, timemete kanyekanye ngekuhlabelela ngenjabulo.