Tihlabelelo 64 - Siswati 1996 Bible

Umthandazo wekuvikelwa etitseni letisitsekile

Sihlabelelo saDavide lesetfulwe kumhlabelisi.

¹ Hhawu, Nkulunkulu! Vani livi lami nangikhala, ulondvolote kuphila kwami elusongweni lwetitsa!

² Ngibhacise etinsongweni talababi, eticunjini talabanemsindvo, yebo, ticumbi talabenta lokubi,

³ labalola lulwimi lwabo lolukhaliphisa kwenkemba, bajijimete ngemavi abo langimicibisholo,

⁴ kuze bamdubule longenacala bamdubule ngekumtuma, bangesabi.

⁵ Badudana ngekwakha emacebo lamabi; bacebisana ngekubeka tingibe emasitseleni, bacabange batsi: “Ngubani longasibona?”

⁶ Basonga tento letimbi bese batsi: “Silakhe ngebuciko lelicebo letfu.” Ingcondvo nenhlitiyo yemuntfu kujulile!

⁷ Kodvwa Nkulunkulu uyawubadubula ngemicibisholo yakhe, abagwaze ngekubatuma lokukhulu.

⁸ Lulwimi lwabo luyawubabhubhisa, bonkhe labababonako bayawunikina tinhloko.

⁹ Bonkhe bantfu bayawushaywa luvalo bashumayele ngalokwentiwe nguNkulunkulu, bakucondze kahle lasakwentile.

¹⁰ Lolungile uyawujabula ngaSimakadze, akhosele kuye! Bonkhe labacotfo ngenhlitiyo bayawumdvumisa.