Tihlabelelo 63 - Siswati 1996 Bible

Kulangatelela Nkulunkulu

Sihlabelelo saDavide lasihlabela ngesikhatsi aselihlane laseJudiya.

¹ Nkulunkulu, wena unguNkulunkulu wami! Ngifuna wena. Umphefumulo wami womele wena, umtimba wami ulambele wena, eveni lelomile naleligagadzekile, live lelite emanti.

² Ngikubonile wena endzaweni yakho lengcwele, ngawabona emandla akho nebukhosi bakho.

³ Ngobe umusa wakho uncono kakhulu kunekuphila; umlomo wami uyawukudvumisa.

⁴ Ngako-ke ngiyawukubonga, yingci nangisaphila; ngiyawuphakamisa tandla tami, ngikhuleke kuwe.

⁵ Umphefumulo wami uyakwesutsiswa kube shangatsi ngidle emanoni nemnkantja, nemlomo wami ukudvumise ngenjabulo.

⁶ Nangilele ngiyakukhumbula; nangicwashile ebusuku ngizindla ngawe,

⁷ ngobe wena ube lusito lwami. Ngako-ke ngiyawuhlabela ngenjabulo emtfuntini wemaphiko akho.

⁸ Umphefumulo wami unamatsela kuwe, sandla sakho sekudla siyangisimisa.

⁹ Kodvwa labafuna kubhubhisa imphilo yami bayawushona phansi ethuneni,

¹⁰ bangenelwe ngetikhali nase ibambene, tidvumbu tabo tibe kudla kwemangce.

¹¹ Kodvwa inkhosi iyawujabula ngaNkulunkulu, bonkhe labafunga ngawe bayawukudvumisa; kepha imilomo yebacambimanga iyawuvalwa.