Tihlabelelo 62 - Siswati 1996 Bible

NguNkulunkulu kuphela losiphephelo setfu

Sihlabelelo saDavide lesetfulwe kumhlabelisi kutsi sihlatjelwe ngendlela yaJeduthuni.

¹ Umphefumulo wami utithulele kuNkulunkulu kuphela, insindziso yami ivela kuye.

² Nguye yedvwa lolidvwala lami, nensindziso yami, nenqaba yami, ngingeke ngishukunyiswe.

³ Kuyawuze kube ngunini nidvumela lendvodza nine nonkhe kuze niyibulale? Injengelubondza lolutjekele kuwa, nanjengelutsango loludzilikako.

⁴ Bafuna licebo lekumketula esikhundleni sakhe lesiphakeme, batsandza emanga. Ngemilomo yabo bayabusisa, kodvwa etinhlitiyweni tabo bayacalekisa. Cabanga.

⁵ Mphefumulo wami, thula kuNkulunkulu, ngobe litsemba lami livela kuye.

⁶ Nguye yedvwa lolidvwala lami, nensindziso yami, nenqaba yami, ngingeke ngitanyatanyiswe.

⁷ Insindziso yami neludvumo lwami kusetandleni taNkulunkulu. Nkulunkulu usiphephelo sami nelidvwala lami lelicinile.

⁸ Nine sive, yetsembelani kuye ngato tonkhe tikhatsi, tfululelani kuye tinhlitiyo tenu, Nkulunkulu usiphephelo setfu. Cabanga.

⁹ Bantfukatana bafanana nemoya nje, tikhulu nato tilite lelite. Nome bafakwa esikalini kanyekanye, balula kunemoya.

¹⁰ Ungalibeki litsemba lakho ebudloveni, ningatilulati ngematsemba lalite nekugcekeza, nome ngabe ingcebo iyandza, ningatibeki tinhlitiyo tenu kuyo.

¹¹ Nkulunkulu ukhulume kanye, ngeva kwaba kubili: kutsi emandla ngakho, Nkulunkulu,

¹² nekutsi umusa wakho, Simakadze. Ngobe wena umuntfu umnika umvuzo njengekwemisebenti yakhe.