Tihlabelelo 61 - Siswati 1996 Bible

Umthandazo wekucela kuvikelwa

Sihlabelelo saDavide lesetfulwe kumhlabelisi kutsi sihlatjelwe ngetingubhu letinetintsambo.

¹ Lalela kukhala kwami, Nkulunkulu, uve umthandazo wami.

² Ngikhala kuwe ngikhashane, emajukujukwini emhlaba, ngesikhatsi inhlitiyo yami idzangele. Ngiholele edvwaleni leliphakeme kakhulu kunami.

³ Ngobe wena usiphephelo sami, uyinqaba lengumbhoshongo locinile wekungivikela esitseni sami.

⁴ Ngiyawukhosela endlini yakho kuze kube phakadze! Ngiyawukhosela ngaphansi kwemaphiko akho. Cabanga.

⁵ Wena, Nkulunkulu, utivile tetsembiso tami, ngobe nguwe lobanika lifa, labo labalesabako libito lakho.

⁶ Yenta inkhosi ikhule ize ikhokhobe, yengeta emalanga ekuphileni kwenkhosi, ime titukulwane ngetitukulwane.

⁷ Ebukhoneni bakho, Nkulunkulu, inkhosi ayihlale esihlalweni sebukhosi, ibuse kuze kube phakadze; uyilondvolote ngemusa wakho nangekwetsembeka kwakho.

⁸ Ngako libito lakho ngiyawulidvumisa kuze kube phakadze, kuze ngigcwalise tetsembiso tami imihla ngemihla.