Tihlabelelo 60 - Siswati 1996 Bible

Umthandazo wekucela kuvikelwa esitseni

Sihlabelelo lesiyimiktamu yaDavide, lesetfulwe kumhlabelisi kutsi sifundziswe satiwe ngekusihlabela ngendlela letsi: “Siphephane.” Bufakazi. Wasihlabela ngesikhatsi alwa nemaSiriya aseMesophothamiya naseSobha, Jowabe wabe sewubuyela emuva wacitsa baka-Edomu labatinkhulungwane letilishumi natimbili endzaweni letsiwa Sigodzi Seluswayi.

¹ Awu, Nkulunkulu, usiyekelele wasilahla, wenta netivikelo tetfu tabhidlitwa, kwaya njengobe usitfukutselele. Buya utesilulamisa.

² Utamatamise umhlaba, wawudzabula timfa; tivale letimfa tawo ngobe uyaceka.

³ Sive sakho usibonise tintfo letimatima, wasinatsisa liwayini sadzakwa, saba ngumhlaba.

⁴ Ubanike luphawu labakwesabako, wabenta bacocana ngaphansi kwalo, kuze bavikeleke emicibisholweni yetitsa. Cabanga.

⁵ Sisindzise ngesandla sakho sekudla, usiphendvule, kuze labatsandzekako bakho bakhululwe.

⁶ Nkulunkulu ukhulume asendzaweni yakhe lengcwele watsi: “Ngiyakwetsaba, ngilehlukanise lakaShekhemu, ngisabe Sigodzi saseSukhothi.

⁷ Live laGileyadi lami, nelive laManase lami, Efrayimu usivikelo senhloko yami, Juda uyindvuku yami yebukhosi.

⁸ Mowabi ungumgezelo wami, etikwa-Edomu ngijika sicatfulo sami. Nine maFilisti, memetani, ningikhonte.”

⁹ Ngitawumikiswa ngubani kulomuti loyinqaba? Ngitawuholwa ngubani kuya ka-Edomu?

¹⁰ Awu, Nkulunkulu, wena usilahlile. Awu, Nkulunkulu, awusahambi nemabutfo etfu emphi.

¹¹ Sisite usephule etitseni tetfu, ngobe lusito lwebantfu lulite.

¹² Sitawutincoma ngaNkulunkulu. Nguye lotawugcobagcoba titsa tetfu.