Tihlabelelo 59 - Siswati 1996 Bible

Umthandazo wekucela kwephulwa etitseni

Sihlabelelo lesiyimiktamu yaDavide. Wasihlabela ngesikhatsi Sawula asatfumele kutsi bagadze umuti waDavide batewumbulala; setfulwe kumhlabelisi kutsi sihlatjelwe ngendlela letsi: “Ungabhubhisi.”

¹ Hhawu, Nkulunkulu wami! Ngephule etitseni tami, ungivikele kulabo labangivukele.

² Ngephule kulabo labatigilamkhuba, ungisindzise kubabulali.

³ Ase ubheke, ngobe bangilalele endleleni bafuna kungibulala, tichwaga titimisele kungihlasela ngaphandle kwesono sami, Simakadze.

⁴ Batilungiselela kungibulala ngaphandle kwesono. Vuka, ungihlangabete ngelusito, ungelekelele.

⁵ Wena, Simakadze, Nkulunkulu Somandla, unguNkulunkulu waka-Israyeli; vuka-ke utewujezisa tonkhe tive, ungahawukeli ngisho namunye kulaba labangemambuka. Cabanga.

⁶ Onkhe emalanga kusihlwa bayaye babuye bashaya umkhulungwane njengetinja, bahambe bazula nalo lonkhe lidolobha.

⁷ Nabo phela, babhonsa ngemilomo yabo, emilonyeni yabo kunetinkemba ngobe batsi: “Ngubani losinakile?”

⁸ Kodvwa wena, Simakadze, uyabahleka, tonkhe tive utenta inhlekisa.

⁹ Yebo, Mandla ami, ngiyawulindzela wena, ngobe wena, Nkulunkulu, uyinqaba yami.

¹⁰ Nkulunkulu wami, uyawungihlangabeta ngemusa wakho. Nkulunkulu wami, uyawungenta ngibabukele phansi labatitsa tami.

¹¹ Ungababulali, funa sive sami sikhohlwe; basakate ngemandla akho, ubalahle phansi, Simakadze, sihlangu setfu.

¹² Emavi abo asono semilomo yabo. Ababhajwe ekutigcabheni kwabo, ngobe bayacalekisa, bacale nemanga.

¹³ Bacedze ngekutfukutsela kwakho, ubanyamalalise baphele batsi nya, kuze bantfu bati kutsi: Nkulunkulu ubusa kaJakobe nasemikhawulweni yemhlaba. Cabanga.

¹⁴ Bayabuya njalo kusihlwa, bahlabe umkhulungwane njengetinja, bahambe bazula lonkhe lidolobha.

¹⁵ Behla benyuka bafunana nekudla, bahhonge nabangakesutsi.

¹⁶ Kodvwa mine ngiyawuhlabela ngibabate emandla akho, ngetsabele umusa wakho ekuseni, ngobe wena uyinqaba yami, waba siphephelo sami ngesikhatsi sekuhlupheka kwami.

¹⁷ Yebo, Mandla ami, ngiyawuhlabela ngikudvumise, ngobe wena, Nkulunkulu, uyinqaba yami. Nguwe, Nkulunkulu, longiphatsa ngemusa.