Tihlabelelo 58 - Siswati 1996 Bible

Umthandazo wekucela kujeziswa kwebabusi lababi

Sihlabelelo lesiyimiktamu yaDavide, lesetfulwe kumhlabelisi kutsi sihlatjelwe ngendlela letsi: “Ungabhubhisi.”

¹ Kambe ngabe nine baholi nehlulela ngalokulungile yini? Bantfu nibehlulela ngekulunga yini? Anehluleli ngekukhetsa yini?

² Ingani etinhlitiyweni tenu niphehla imisebenti lemibi, tandla tenu ticaphele kwenta budlova emhlabeni.

³ Bantfu lababi batsi batalwa nje, babe bangenela indlela lembi, bacale emanga.

⁴ Sihlungu sabo sinjengesihlungu senyoka, banjengaphemphetfwane lovale tindlebe takhe,

⁵ entela kungaliva liphimbo lalabenta imilingo, nome-ke sebalumba emalumbo ngekuhlakanipha.

⁶ Hhawu, Nkulunkulu, hhohlota ematinyo lasemilonyeni yabo, wephule imihlatsi yelibhubesi, Simakadze.

⁷ Abashabalale njengemanti lageletako, abuye ashone phansi esihlabatsini; imicibisholo yabo ayibe tidlindzi nabajijimeta ngayo.

⁸ Bente bancibilike baphele njengemnenkhe lohamba unafutela; babe njengemntfwana lotalwe asafile, longazange alibone nelilanga.

⁹ Ngekutumeka lokukhulu Nkulunkulu uyawubaphephula bonkhe lababi, ababhubhise, njengelibhodo lelitsi lisandza kubekwa nje etiko, lisengakawuva nalowo mlilo, kufike umoya lomkhulu uphephule letinkhuni, nome tomile nome timanti.

¹⁰ Labalungile bayawujabula nababona kuphindziselwa kwalababi, bayawuklabhuta ngetinyawo tabo engatini yalababi.

¹¹ Bantfu batabe sebatsi: “Ngempela lolungile uyavuzwa, ngempela ukhona Nkulunkulu lowehlulela emhlabeni.”