Tihlabelelo 56 - Siswati 1996 Bible

Umthandazo wemuntfu lowetsembele kuNkulunkulu

Sihlabelelo saDavide lesiyimiktamu leligugu kuye; setfulwe kumhlabelisi kutsi sihlatjelwe ngendlela letsi: “Lituba lisesihlahleni lesikhashane.” Wasihlabela aseGathi ngesikhatsi emaFilisti ambambile.

¹ Ngihawukele, Nkulunkulu, ngobe bantfu bayangigcobagcoba; onkhe emalanga labamelene nami bayangihlasela.

² Titsa tami tingigcobagcoba onkhe emalanga, ngobe labanyenti balwa nami ngekutigabatisa.

³ Mhlazana ngifikelwa kwesaba ngiyawubeka litsemba lami kuwe.

⁴ Ngiyawudvumisa livi laNkulunkulu ngekusitwa nguNkulunkulu, ngetsembele kuNkulunkulu angesabi lutfo. Pho, umuntfu angangentani nje?

⁵ Bahlanekela inkhulumo yami onkhe emalanga, bakha onkhe emacebo lamabi ngami.

⁶ Bayabutsana bangilalele emasitseleni, tinyatselo tami baticaphele njengobe bashophene nekuphila kwami.

⁷ Bayawuphunyula yini ebubini babo? Dzilita tive ngelulaka lwakho, Nkulunkulu.

⁸ Wena ukucaphele kubaleka kwami, yetsa tinyembeti tami egabheni lakho, atikabhalwa yini encwadzini yakho?

⁹ Ngako titsa tami tiyawuncandzeka ngalelo langa lengiyawukhala ngalo kuwe, ngati kahle kamhlophe kutsi Nkulunkulu ungakimi.

¹⁰ Ngidvumisa livi laNkulunkulu, ngidvumise livi laSimakadze.

¹¹ Ngetsembele kuNkulunkulu, angesabi lutfo. Pho, umuntfu angangentani nje?

¹² Hhawu, Nkulunkulu, ngibopheleke kuwe ngetetsembiso tami. Ngiyawunikela kuwe iminikelo yekubonga.

¹³ Ngobe ungephulile ekufeni, wavikela tinyawo tami kutsi tingawi, kuze ngihambe embikwaNkulunkulu, ngisekukhanyeni kwekuphila.