Tihlabelelo 55 - Siswati 1996 Bible

Umthandazo wekucela kubhujiswa kwalababi

Sihlabelelo lesiyimaskili yaDavide; setfulwe kumhlabelisi kutsi sihlatjelwe ngetingubhu letinetintsambo.

¹ Hhawu, Nkulunkulu, beka indlebe, ulalele umthandazo wami, ungakufulatseli kuncusa kwami.

² Nginake, ungiphendvule. Imicabango yami iyangihlupha, sengidzimate ngakhatsateka,

³ ngenca yekuva tinsongo tetitsa nencindzetelo yalababi, ngobe bangiletsele kukhatsateka. Tingiletsele kuhlupheka lokunyenti, tiyangitfukutselela tingibambele emagcubu.

⁴ Inhlitiyo yami iyatfutfumela ngekhatsi kwami, sengiseluvalweni lwekufa.

⁵ Ngiphetfwe kwesaba nekutfutfumela, neluvalo selungicedze emandla.

⁶ Ngase ngitsi: “Kube mane nginetimphiko njengelituba! Ngabe ngindizela le khashane ngiyewuhlala ekuphumuleni.

⁷ Yebo, bengitawubaleka ngiye khashane, ngiyewuhlala ehlane. Cabanga.

⁸ “Ngabe ngiphutfuma endzawemi yami yekuphepha, ngibe khashane nemoya nesivunguvungu.”

⁹ Hhawu, Simakadze, citsa lusongo lwabo, uphambanise inkhulumo yabo, ngobe ngibona umbango nekuphikisana kulelidolobha.

¹⁰ Lelidolobha kulitungeleta imini nebusuku, kuhambahambe etikwetindvonga talo; bubi nelusizi kubusa ekhatsi kwalo.

¹¹ Umonakalo ungekhatsi kwalo incindzetelo nebucili akusuki enkhundleni yalo.

¹² Akusiso sitsa sami lesingigalajelako, ngobe kube bekungiso, bengingasibeketelela; akusiye longitondzako longibangisako, ngobe kube bekunguye, bengitambhacela.

¹³ Kodvwa nguwe, ntsanga yetfu, lesishuca nawe, nalongumngani wami.

¹⁴ Sasihlalisana kamnandzi nawe sasihamba nawe, nesicumbi, nasiya endlini yaNkulunkulu.

¹⁵ Titsa tami atitunywe kufa, tiye endzaweni yalabafile tisaphila, ngobe bubi busemakhaya nasetinhlitiyweni tabo.

¹⁶ Kodvwa mine ngikhala kuNkulunkulu, Simakadze uyawungisindzisa.

¹⁷ Kusihlwa, nasekuseni, nasemini ngiyatikhalela ngibubule kuye, bese uyaliva livi lami.

¹⁸ Uyawungihlenga, anginike kuthula, angivikele kulemphi lengibhekene nayo, nome babanyenti labalwa nami.

¹⁹ Nkulunkulu utangiva, angiphindzisele kubo, yena lokhona phakadze. Cabanga. Labantfu abaphendvuki, abamesabi ngisho naNkulunkulu.

²⁰ Lowo mngani-ndzini sewucabana nebangani bakhe, wephula sivumelwane sakhe.

²¹ Inkhulumo yakhe ishelelisa kwelibhotela, noko inhlitiyo yakhe ifukamele imphi, emavi akhe atsambe kwengca emafutsa, noko atinkemba letilindzele kugwaza.

²² Lahlela imitfwalo yakho kuSimakadze, yena uyawukusimisa; angeke avume phakadze naphakadze kutsi lolungile wakhe atanyatanyiswe.

²³ Wena Simakadze nguwe loyawubajikijela phansi, emgodzini wekufa. Bantfu bengati nenkhohliso bangeke baphile, ngisho nencenye yemphilo yabo. Kodvwa mine ngiyakwetsembela kuwe.