Tihlabelelo 52 - Siswati 1996 Bible

Kutigabatisa ngebubi kulite

Sihlabelelo saDavide lesiyimaskili lesetfulwe kumhlabelisi. Wasihlabela ngesikhatsi Dowegi waka-Edomi aye kuyawubikela Sawula watsi: “Davide ungenise endlini ya-Ahimeleki.”

¹ Wena sichwaga, utigabatiselani ngalokubi? Umusa waNkulunkulu uyawuma kuze kube phakadze.

² Lulwimi lwakho lusonga lokubi lunjengensingo lekhaliphako, wena lowenta emacebo.

³ Utsandza kakhulu bubi kunebuhle utsandze emanga kunekukhuluma liciniso. Cabanga.

⁴ Wena utsandza kulimata bantfu ngelulwimi lwakho.

⁵ Ngako-ke Nkulunkulu uyawukubhidlita siphelane, uyawukuhudvula akukhiphe ekhaya lakho, akuzuphune eveni lalabaphilako. Cabanga.

⁶ Labacotfo bayawukubona batfutfumele, bamhleke lusulu batsi:

⁷ “Ase nibuke, naso phela sichwaga lesingazange simente Nkulunkulu abe yinqaba yaso, kodvwa setsembela ebunyentini bengcebo yaso, sifuna kuba nemandla ngebunyoka baso.”

⁸ Kodvwa-ke mine ngifana nesihlahla lesiluhlata, nemncumo losendlini yaNkulunkulu. Umusa waNkulunkulu lomile ngetsembele kuwo phakadze naphakadze.

⁹ Ngiyawukubonga naphakadze ngaloko lokwentile. Ngiyawumemetela libito lakho emkhatsini walabangcwele, ngobe lona lihle.