Tihlabelelo 50 - Siswati 1996 Bible

Nkulunkulu ungumehluleli

Sihlabelelo sa-Asafa.

¹ Nkulunkulu wabonkulunkulu unguSimakadze lokhulumako. Umemetela emhlabeni wonkhe, kusukela emphumalanga kuye enshonalanga.

² ESiyoni lenebuhle lobuphelele, kulapho Nkulunkulu akhatimula khona.

³ Nkulunkulu wetfu uyeta, angeke abindze. Embikwakhe kunemlilo locotfulako, utungeletwe sivunguvungu lesesabekako.

⁴ Ubita emazulu ngetulu kanye nemhlaba, kutsi atekwehlulela bantfu bakhe, atsi:

⁵ “Baletseni la bonkhe labangcwele bami labenta nami sivumelwane ngemhlatjelo!”

⁶ Emazulu amemetela kulunga kwakhe, ngobe Nkulunkulu ungumehluleli. Cabanga.

⁷ “Lalelani-ke, sive sami, nginitjele. Ye Israyeli, nginibeka licala! Ngimi Nkulunkulu, longuNkulunkulu wenu.

⁸ Anginitsetsiseli imihlatjelo yenu, yebo, umhlatjelo loshiswa wonkhe uhlala usembikwami sonkhe sikhatsi.

⁹ Angidzingi kutsatsa tinkunzi emitini yenu, angidzingi ngisho netiphongo etibayeni tenu imbala,

¹⁰ ngobe tonkhe tilwane tesiganga tami, ngisho netinkhomo leteluke emagcumeni latinkhulungwane ngetinkhulungwane,

¹¹ ngati tonkhe tinyoni tesiganga, konkhe lokuphilako kwesiganga kwami.

¹² “Kube bengilambile, bengingeke nginitjele, ngobe umhlaba nako konkhe lokukuwo kwami.

¹³ Kantsi mine ngiyayidla yini inyama yetinkunzi, nome ngiyayinatsa yini ingati yetiphongo?

¹⁴ Nikela kuNkulunkulu umnikelo wekubonga, ugcine tetsembiso takho kuLosetikwako Konkhe.

¹⁵ Khala kimi ngetikhatsi tekuhlupheka, ngiyawukukhulula, bese uyangidvumisa.”

¹⁶ Kodvwa kulomubi Nkulunkulu utsi: “Unalungelo lini lekukhuluma ngetimiso tami uphatse sivumelwane sami ngemlomo wakho?

¹⁷ Ngobe wena uyakutondza kuyalwa, emavi ami uwengca ngetulu.

¹⁸ Utsi ungabona lisela, ube ngematse nelulwimi nalo, umdzibi ndzawonye netiphingi.

¹⁹ “Umlomo wakho ulula ekukhulumeni lokubi, lulwimi lwakho lubumba emacebo nenkhohliso.

²⁰ Uhlala ngekuhleba umnakenu, unyembenye indvodzana yenyoko.

²¹ Loko ukwentile, kodvwa mine ngathula; wenta shangatsi mine ngifanana nawe. Kodvwa sengitakwekhuta, ngitawubeka licala emehlweni akho ubuka.

²² “Caphelani loku nine lenedzelela Nkulunkulu, funa nginiklebhuklebhule, kubete nalongahle aniphephise.

²³ Lowo lonikela umnikelo wekubonga, uyangidvumisa. Utiphendlela indlela, kutsi ngimkhombise insindziso yaNkulunkulu.”