Tihlabelelo 49 - Siswati 1996 Bible

Bulima bekwetsemba ingcebo

Sihlabelelo sentalelwane yaKhora lesetfulwe kumhlabelisi.

¹ Vanini loku, nonkhe nine tive! Bekani indlebe, nonkhe nine lenakhile emhlabeni.

² Lalelani bantfukatana nani tikhulu, nine tinjinga nani timphuya nonkhe!

³ Umlomo wami utawukhuluma lwati, imicabango yenhlitiyo yami ibonakalise kucondza.

⁴ Ngiyawubeka indlebe yami ngilalele inkhulumo lenenhlakanipho, ngiphenye imfihlakalo ngekudlala lugubhu lwetintsambo.

⁵ Pho, ngitakwesabani ngetikhatsi tekuhlupheka, nangabe bubi bebatingeli bami sebungitungeletile,

⁶ labatsembele badzimate bachosha ngebunyenti bengcebo yabo?

⁷ Impela kute umuntfu longahlenga umnakabo, nome-ke anike Nkulunkulu intsengo yemphilo yakhe.

⁸ Ngobe phela kuhlengwa kwemphefumulo wakhe kubita kakhulu, kute intsengo lengakwenela

⁹ kutsi angachubeka aphile kuze kube phakadze, angayi nekuya nje ethuneni.

¹⁰ Yebo, wonkhe umuntfu uyabona kutsi netihlakaniphi tiyafa njengobe tilima netiphukuphuku tifa, tishiye ingcebo yato kutsi idliwe ngulabanye.

¹¹ Emathuna alikhaya labo phakadze naphakadze; bayawuhlala kuwo siphelane, nome bake baba nemave letsiwa ngemabito abo.

¹² Umuntfu nome angaba netidvumo, angeke ahlale angafi, unjengetilwane letifa kungabi ndzaba talutfo.

¹³ Bukani-ke siphetfo salabo labatetsembako, nesebalandzeli babo labavumelana netinkhulumo tabo. Cabanga.

¹⁴ Banjengetimvu letimele kubulawa, babhekene nekufa. Labacotfo bayawubabusa ngemuso, tidvumbu tabo tibole ethuneni, balahlekelwe nangemakhaya abo.

¹⁵ Kodvwa, Nkulunkulu, umphefumulo wami uyakuwuhlenga emandleni ekufa ngobe uyawungemukela. Cabanga.

¹⁶ Ungesabi lutfo, nakanjinga umuntfu, lapho bunjinga bakhe sebandza;

¹⁷ ngobe nasafa, kute latawuhamba nako, ngisho nebunjinga bakhe imbala.

¹⁸ Nome umuntfu angatidvumisa abuse asaphila, nome bantfu bangamdvumisa ngebuciko bakhe,

¹⁹ utawuhamba aye kubakubo lase bafa, lapho kunebumnyama baphakadze.

²⁰ Umuntfu loyingcunga kepha abe ate kucondza, naye uyawufa njengetilwane letifa kungabi ndzaba talutfo.