Tihlabelelo 48 - Siswati 1996 Bible

Buhle neludvumo lweSiyoni

Ingoma lesihlabelelo sentalelwane yaKhora.

¹ Simakadze mukhulu, ufanele kubongwa kakhulu, ubongeka ekhaya laNkulunkulu wetfu, lekuyintsaba yakhe lengcwele.

² Yinhle ngekuphakama kwayo, ikujabula kwemhlaba wonkhe. INtsaba iSiyoni isemaphetselweni enyakatfo, ilikhaya leNkhosi lenkhulu.

³ Nkulunkulu usetindlini talo, naye utibonakalisile kutsi uyinqaba yalo sibili.

⁴ Emakhosi-ke wona abutsana, ayawuhlasela iNtsaba iSiyoni.

⁵ Atsi kube ayibone amangala, ashaywa luvalo, atsi galu yephuka.

⁶ Agcwala emanti emadvolweni, efikelwa buhlungu lobukhulu, njengebemfati lobelekako.

⁷ Imikhumbi lemikhulu yaseThashishi, wayifohlota ngemoya wemphumalanga.

⁸ Njengobe sivile ngemisebenti layentile Nkulunkulu, namanje sesitibonele ekhaya laNkulunkulu Somandla, ekhaya laNkulunkulu wetfu. Lelo khaya Nkulunkulu uyawulakha, alicinise phakadze naphakadze. Cabanga.

⁹ Yebo, Nkulunkulu! Siyazindla ngemusa wakho, sisethempelini lakho.

¹⁰ Yebo, Nkulunkulu! Ludvumo lwakho lufana nelibito lakho, luhamba luze lufike emaphetselweni emhlaba. Sandla sakho sangesekudla sigcwele kulunga.

¹¹ Shangatsi ingajabula iNtsaba iSiyoni! Shangatsi bantfu bakaJuda bangatfokota, ngenca yetehlulelo takho.

¹² Hambani nitungelete iSiyoni, nijikelete nibale imibhoshongo yayo.

¹³ Bukisisani tindvonga tayo, nihambahambe etindlini tayo tebukhosi, nize nilandzise netitukulwane letitako

¹⁴ kutsi loNkulunkulu unguNkulunkulu wetfu phakadze naphakadze; uyawusihola ngisho nasekufeni.