Tihlabelelo 46 - Siswati 1996 Bible

Nkulunkulu usiphephelo setfu nemandla etfu

Sihlabelelo lesiyingoma; sentalelwane yaKhora; setfulwe kumhlabelisi kutsi sihlatjelwe ngetingubhu ngendlela letsi: “Tintfombi.”

¹ Nkulunkulu siphephelo setfu nemandla etfu, utfolakala alusito ekuhluphekeni.

² Ngako-ke kute lesikwesabako: nome kugucuka umhlaba utanyatanyiswe, nome tintsaba tingacwila ekujuleni kwelwandle,

³ nome lwandle lugubha luhlokoma, nome tintsaba setitanyatanyiswa lulaka lwalo. Cabanga.

⁴ Kukhona umfula lonemifudlana lejabulisa labo labasekhaya laNkulunkulu, endlini lengcwele yaLosetikwako Konkhe.

⁵ Nkulunkulu uhlala kulelo khaya, lingeke litanyatanyiswe, Nkulunkulu uyawulisita ekuseni entsatsakusa.

⁶ Tive tiyavungama, imibuso iyatamatama; uvakalisa livi lakhe, umhlaba uncibilike.

⁷ Nkulunkulu Somandla unatsi, Nkulunkulu waJakobe usiphephelo setfu. Cabanga.

⁸ Wotani nitewubona imisebenti yaSimakadze, emhlabeni wente tintfo letimangalisako.

⁹ Uvimba acedze timphi kutsi tichubeke emhlabeni wonkhe jikelele. Ufohlota butjoki, ephule sikhali, tincola atishise ngemlilo.

¹⁰ Yena utsi: “Yekelani kulwa! Kufanele nati kutsi mine nginguNkulunkulu. Ngengamela tive kanye nemhlaba wonkhe.”

¹¹ Nkulunkulu Somandla unatsi, Nkulunkulu waJakobe usiphephelo setfu. Cabanga.