Tihlabelelo 45 - Siswati 1996 Bible

Ingoma yemshado wasebukhosini

Sihlabelelo lesiyingoma yelutsandvo lesetfulwe kumhlabelisi kutsi sihlatjelwe ngendlela letsi: “Tiphephane;” sentalelwane yaKhora.

¹ Inhlitiyo yami itsintsekile ngalendzaba, ngigeceta nginkentete; ngibalisa ngetibongo enkhosini, lulwimi lwami lunjengelutsi lwekubhala lwalobhala ngebungcweti.

² Awusemuhle nekadzeni, uphuma embili, umlomo wakho uphuphuma umusa, ngobe Nkulunkulu ukubusise phakadze naphakadze.

³ Hhawu, chawe lemachawe, bophela inkemba yakho elukhalweni lwakho, uhlome ngenkhatimulo yakho nangebukhosi bakho.

⁴ Yebo, gibela ngebukhosi bakho, uphume imphi, uyewuncoba, umele liciniso, uvikele nekulunga; shangatsi sandla sakho sangesekudla singafundzisa imisebenti yakho lesabekako.

⁵ Imicibisholo yakho iyakhalipha, ihlaba inhlitiyo yetitsa tenkhosi, udle netive, utilahle ngaphansi kwakho.

⁶ Sihlalo sakho sebukhosi, Nkulunkulu, saphakadze naphakadze, kubusa kwakho kumsulwa, akukhetsi.

⁷ Kulunga uyakutsandza, kodvwa uyakutondza lokubi. Ngako-ke, Nkulunkulu, longuNkulunkulu wakho, ukugcobise ngemafutsa enjabulo, wakuphakamisa ngetulu kwebangani bakho.

⁸ Tonkhe tingubo takho titselwe ngemakha emure, newenhlaba, newemphepho. Esigodlweni lesihlotjiswe ngekwematinyo endlovu, kuvakala tintsambo letikhala kamnandzi naletitfokotisako.

⁹ Emadvodzakati emakhosi asemkhatsini wetintfombi takho telikhetselo; nangesandleni sakho sangesekudla kume indlovukazi levunule tembatfo tegolide yase-Ofiri.

¹⁰ Kuwe-ke, ndvodzakati yami, ngitsi: “Vula indlebe yakho, ulalele naku lengikushoko: Sikhohlwe sive sakini nebakenu.

¹¹ Lobuhle bakho-ke buyawuyikhanga lenkhosi; uyitfobele, ngobe ingumyeni wakho.

¹² Wena, ndvodzakati yaseThire, tingcunga tiyawutincengela kuwe ngekukuletsela tipho.”

¹³ Kucwebetela kodvwa lokusesigodlweni, inkhosatana yembetse tingubo letelukwe ngegolide.

¹⁴ Imikiswa enkhosini, yembetse bukhatikhati, ihamba netintfombi letitimphekeleteli, letishuca emvakwayo, nato tiya kuyo.

¹⁵ Bamikiswa kuyo ngekujabula nangekutsakasa, nabangena esigodlweni sengwenyama.

¹⁶ Emadvodzana akho, nkhosi, ayawubasetikhundleni taboyise, uyakuwabeka abe tikhulu eveni lonkhe.

¹⁷ Libito lakho ngiyakulenta likhunjulwe titukulwane ngetitukulwane, ngako-ke tive tiyawukubonga kuze kube phakadze naphakadze.