Tihlabelelo 40 - Siswati 1996 Bible

Sekubonga kwephulwa

Sihlabelelo saDavide lesetfulwe kumhlabelisi.

¹ Lusito lwaNkulunkulu ngalulindzela ngesineke, wavula indlebe yakhe, wakuva kuncusa kwami.

² Wangikhipha emgodzini wekufa, wangikhipha eludzakeni lolubishako, wasimisa tinyawo tami etikwelidvwala, wacinisa kuhamba kwami.

³ Wafaka ingoma lensha emlonyeni wami, ingoma yekudvumisa Nkulunkulu wetfu. Labanyenti bayawubona bamesabe, babeke litsemba labo kuSimakadze.

⁴ Ubusisiwe umuntfu lobeke litsemba lakhe kuNkulunkulu, longagucukeli kulabatigabatisako, nakulabo labedukela etithicweni.

⁵ Yebo, Simakadze, Nkulunkulu wami, timangaliso losentele tona tinyenti, tingeke tibalwe, wasikhumbula tikhatsi letinyenti. Kute nome munye nje lofana nawe! Kube bengingatilandzisa tonkhe betingeke tibaleke tonkhe.

⁶ Awujatjuliswa ngumhlatjelo nemnikelo, kodvwa ujatjuliswa kusebentisa tindlebe longiphe tona. Awuzange sewusho kutsi ufuna umhlatjelo loshiswa samuku, nome umnikelo wekuhlawulela sono.

⁷ Ngase ngiphendvula ngitsi: “Naku ngilapha! Emculwini wencwadzi kubhalwe ngami.

⁸ Yebo, Nkulunkulu wami, kujabula kwami kusekwenteni intsandvo yakho, imiyalo yakho isenhlitiyweni yami.”

⁹ Kulunga kwakho ngakushumayela kulabanyenti. Angikatibambi tindzebe tami, naloko nguwe lokwatiko, Simakadze.

¹⁰ Kulunga kwakho angikakufihli enhlitiyweni yami. Ngashumayela ngekwetsembeka kwakho nangensindziso yakho. Umusa wakho neliciniso lakho angilifihlanga emikhambatsini.

¹¹ Hhawu, Simakadze, ungangigodleli sihawu sakho; shangatsi umusa wakho, neliciniso lakho, nekwetsembeka kwakho kungangigcina njalonjalo.

¹² Ngitungeletwe tinhlupheko letinyenti, licala lekona lingigabhe kangangekutsi angisaboni nekubona. Letinhlupheko tinyenti tendlula tinwele tenhloko yami, sengilahlekelwe litsemba.

¹³ Akube kuhle kuwe, Simakadze! Ase ungikhulule, Simakadze! Phutfuma ungisite.

¹⁴ Bonkhe bantfu labafuna kungibulala abahlazeke basangane. Bantfu labangifisela lokubi abancandzekiswe bahlazekile.

¹⁵ Abashaywe luvalo ngenca yelihlazo labo, bonkhe labo labasho kimi batsi: “Yehhehhe!”

¹⁶ Abatfokote bajabule kuwe, bonkhe labakufunako, labatsandza insindziso yakho basho njalo batsi: “Akudvunyiswe Simakadze!”

¹⁷ Nome ngihlupheka ngimphofu, kepha iNkhosi iyanginakekela. Wena ungumsiti wami nemkhululi wami; Nkulunkulu wami, ungalibali.