Tihlabelelo 39 - Siswati 1996 Bible

Kuphila kwemuntfu kuyendlula masinyane

Sihlabelelo saDavide lesetfulwe kumhlabelisi Jeduthuni.

¹ Ngacabanga ngatsi: “Ngiyawunakekela tindlela tami, kuze ngingoni ngelulwimi lwami, umlomo wami ngiyakuwufaka sifonyo, yingci nangisesembikwalomubi.”

² Ngaba simungulu, ngabindza, ngangete ngasho lutfo nangalokuhle. Tinhlungu tadlanga.

³ Inhlitiyo yami yavutsa, yashisa ngekhatsi kwami, ngisacabanga ngizindla ngaloko, kwaphembeka umlilo kimi, ngadzimate ngakhuluma ngatsi:

⁴ “Simakadze, ngatise sigcino sami, ungatise nebungako bekuphila kwami, ncono ngati kutsi ngiyendlula lapha emhlabeni.”

⁵ Imihla yami ingangemphama yesandla. Kuphila kwami kubukeka kulite kuwe. Impela, kuphila kwemuntfu kunjengenkhungu. Cabanga.

⁶ Impela, kuphila kwemuntfu kunjengesitfunti. Utihlupha ngelite nje. Ucongelela ingcebo, akabati labatawuyidla.

⁷ Manje-ke, Nkhosi, ngisalindzeleni? Litsemba lami likuwe.

⁸ Ngikhulule kuto tonkhe tiphambuko tami, ungavumi ngibe yinhlekisa yetilima.

⁹ Ngiyawuvala umlomo wami ngingasho lutfo, ngobe kunguwe longente ngahlupheka.

¹⁰ Susa kimi umvimba wakho lobuhlungu, sengifile tidvubule tekushaya kwakho.

¹¹ Nawekhuta umuntfu, umjezisa ngenca yekona kwakhe, umhlikite njengendvwangu lenhle kakhulu nayidliwa ngumvunya. Impela, kuphila kwemuntfu kunjengenkhungu. Cabanga.

¹² Hhawu, Simakadze! Lalela umkhuleko wami, ubeke indlebe yakho ekuncuseni kwami, ungatitibi tinyembeti tekukhala kwami. Ngobe mine ngingumfokati lokhosele kuwe, ngisihambi njengabokhokho bami bonkhe.

¹³ Ngiyekele! Ungabe uloku ungigolotele, ngobe ngifuna kuphindze ngijabule, ngingakahambi emhlabeni.