Tihlabelelo 38 - Siswati 1996 Bible

Umkhuleko wekomela Nkulunkulu (Sihlabelelo sesitsatfu sekutisola)

Sihlabelelo saDavide lesisikhumbuto.

¹ Awu, Simakadze, ungangikhahli ngentfukutselo yakho, ungangijezisi ngelulaka lwakho.

² Imicibisholo yakho ingihlabe yangena, nesandla sakho sehlele etikwami.

³ Sekute imphilo emtimbeni wami, ngenca yelulaka lwakho; kute ngisho nekuthula ematsanjeni ami, ngenca yesono sami.

⁴ Tono tami tingigabhile, ngisesiswa ngumtfwalo wato losindzako.

⁵ Tilondza tami tinuka luvundze, tincinca bovu, ngenca yebulima bami,

⁶ ngikhonkhobele, ngatfotjiswa kakhulu, ngihamba ngikhala lilanga lonkhe.

⁷ Lukhalo lwami lucacamba kakhulu, sekute imphilo emtimbeni wami.

⁸ Ngibutsakatsaka, ngidvubuteke kabi, ngiyabubula ngenca yekutfutfumela enhlitiyweni yami.

⁹ Nkhosi, kufisa kwami konkhe uyakwati, kububula kwami akukafihleki kuwe.

¹⁰ Inhlitiyo yami iyagcuma, ngiphelelwa ngemandla, emehlo ami asacundzekile, akasaboni.

¹¹ Bangani bami nebazalwane bami sebangikhweshele, ngenca yemanceba ami; ngisho nebaketfu imbala sebeme lapha khashane.

¹² Bantfu labacondze kungibulala bangetsiye ngetingibe, labacondze kungilimata bakhuluma ngekungicitsa bangibulale, sonkhe sikhatsi bakha emacebo ebubi ngami.

¹³ Kodvwa mine, nginjengesihhulu, angiva; nginjengesimungulu, angikhulumi.

¹⁴ Nginjengendvodza lengeva etindlebeni, nalengakwati kutikhulumela.

¹⁵ Mine-ke, Simakadze, ngime ngetsembele kuwe, nguwe, Nkhosi, Nkulunkulu wami lotawuphendvula.

¹⁶ Ngobe enhlitiyweni yami ngitsite: “Bangahle bajabule ngami ekusheleleni kwelunyawo lwami. Shangatsi bangete bacolosha ngami.”

¹⁷ Ngobe sengisezingeni lekuwa, nebuhlungu bami abusuki kimi.

¹⁸ Ngiyalivuma licala lekona kwami, ngidzabukile ngenca yesono sami.

¹⁹ Titsa tami tiphila kahle tinemandla, banyenti nalabangitondza ngaphandle kwesici.

²⁰ Labo labangiphindzisela lokubi ngalokuhle, batitsa tami, ngobe ngilandzela lokulungile.

²¹ Hhawu, Simakadze! Ungangilahli! Nkulunkulu wami, ungakhweshi kimi!

²² Phutfuma ungisite, Nkhosi, nsindziso yami!