Tihlabelelo 37 - Siswati 1996 Bible

Kungaphephi kwalababi

Sihlabelelo saDavide.

¹ Ungatihluphi ngalababi, ungahawukeli kulabenta lokubi.

² Ngobe phela lababi bayawusheshe bashate njengetjani, babune njengembuya.

³ Tsemba kuSimakadze, wente lokuhle, uhlale eveni, uve bumnandzi bekudla emadlelweni laluhlata.

⁴ Yenta Simakadze abe yinjabulo yakho, yena-ke utakupha lokufiswa yinhlitiyo yakho.

⁵ Nikela indlela yakho kuSimakadze, umetsembe, yena-ke uyawukutsatsela tinyatselo.

⁶ Kulunga kwakho uyawukwenta kugcame njengekukhanya, nebucotfo bakho bukhanye njengemini.

⁷ Thula embikwaSimakadze, umlindzele ngesineke. Ungahawukeli kumuntfu lonotsa ngebucili bakhe.

⁸ Tibambe ungatfukutseli, uluyekele lulaka, ungacansuki, ngobe loko kubanga kona.

⁹ Benti balokubi batawushabalaliswa; kodvwa labalindzela Simakadze bayakudla lifa lemhlaba.

¹⁰ Emvakwesikhashana benti balokubi bayawunyamalala, uyakutsi uyabafuna bangabe basatfolakala.

¹¹ Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.

¹² Lomubi usongela lolungile, amsinekele ematinyo.

¹³ Kodvwa Simakadze uyamhleka lona lomubi, ngobe uyabona kutsi sekuyamphelela.

¹⁴ Lababi bahosha inkemba, bantsale imicibisholo ebutjokini, bafuna kucedza labamphofu nalabeswele babulale labo labahamba ngebucotfo.

¹⁵ Kodvwa inkemba yabo iyawugwaza tinhlitiyo tabo, imicibisholo yabo iyakwephuka.

¹⁶ Lokuhle lokuncane lanako lolungile, kuncono kunemcebo wonkhe walababi.

¹⁷ Emandla alababi ayawukwephulwa, kodvwa Simakadze uyabaphasa labalungile.

¹⁸ Simakadze uyawati emalanga alabacotfo, nelifa labo liyawuhlala lilabo phakadze naphakadze.

¹⁹ Bangeke bajabhiswe ngetikhatsi letimatima, bayawuba nenala ngetikhatsi tendlala.

²⁰ Kodvwa lababi bayawubhubha, netitsa taSimakadze tishabalale njengeluhlata lwemadlelo, bayawunyamalala baphele njengentfutfu.

²¹ Lomubi uyeboleka angabuyiseli, kodvwa lolungile unesihawu, ephane.

²² Lababusiswe nguSimakadze bayawulidla lifa lemhlaba; kodvwa labacalekiswe nguye bayawushabalaliswa.

²³ Tinyatselo temuntfu ticondziswa nguSimakadze. Simakadze uyaticinisa tinyatselo temuntfu lomjabulisako.

²⁴ Nome awa, angeke ahlale angavuki, ngobe Simakadze ubamba sandla sakhe.

²⁵ Bengingumntfwana, manje sengimdzala, angizange sengimbone lolungile alahliwe, ngisho nebantfwabakhe abahambi bacela kudla.

²⁶ Unesihawu lonkhe lilanga, ebolekise, nebantfwana bakhe basibusiso.

²⁷ Khwesha ebubini, wente lokuhle; uhlale uphila njalonjalo.

²⁸ Ngobe Simakadze uyakutsandza kwenta tintfo ngendlela lefanele, angeke abayekelele labangcwele bakhe. Labalungile bayawulondvoloteka phakadze naphakadze; kodvwa bantfwana balomubi bayawushabalaliswa.

²⁹ Labalungile bayawudla lifa lemhlaba, bahlale kulo kuze kube phakadze.

³⁰ Tindzebe talolungile tikhuluma inhlakanipho, lulwimi lwakhe lukhuluma loko lokufanele.

³¹ Umtsetfo waNkulunkulu uhlala usenhlitiyweni yakhe njalo, nekuhamba kwakhe akuphambuki.

³² Lomubi utingela lolungile, ucondze kutsi ambulale.

³³ Simakadze angeke amyekelele esandleni salomubi, futsi lowo lolungile angeke alahlwe ngelicala, nakehlulelwa.

³⁴ Tsemba Simakadze, ugcine indlela yakhe, yena uyawukuphakamisa udle lifa lemhlaba ubone kushabalaliswa kwalababi.

³⁵ Ngake ngabona lomubi asidlova, watenweba njengesihlahla semsedari waseLebanoni.

³⁶ Wafa, kwaba kunyamalala kwakhe; ngabatse ngiyamfuna wangete watfolakala.

³⁷ Ubombekisa lolungile, umcaphelisise locotfo, ngobe umuntfu wekuthula unelikusasa lelihle;

³⁸ kodvwa lababi bayawubhujiswa nya, nebantfwababo bate likusasa.

³⁹ Insindziso yalabalungile iphuma kuSimakadze, usiphephelo sabo ngesikhatsi sekuhlupheka.

⁴⁰ Simakadze uyabasita abakhulule, ubephula abasindzise kulababi, ngobe babalekela kuye, abe siphephelo sabo.