Tihlabelelo 36 - Siswati 1996 Bible

Lutsandvo lwaSimakadze lume njalo

Sihlabelelo saDavide, inceku yaSimakadze, lesetfulwe kumhlabelisi.

¹ Sono siyakhuluma ekujuleni kwenhlitiyo yalomubi. Yebo, lomubi akamesabi Nkulunkulu.

² Utiphakamisa kangangekutsi akabuboni nebubi besono sakhe.

³ Inkhulumo yakhe ikuganga nemacebo; ubuyekele bucotfo bakhe nekwenta lokulungile.

⁴ Utsi alele abe akha emachinga ekuganga, sewuhamba ngendlela lembi, akakwenyanyi lokubi aphambane nako.

⁵ Simakadze, umusa wakho ufikela amazulwini, kwetsembeka kwakho kufikela emafini.

⁶ Kulunga kwakho kunjengetintsaba letinkhulu, tincumo takho tijule njengelwandle. Simakadze, ulondvolota bantfu netilwane.

⁷ Yebo, Nkulunkulu, umusa wakho uligugu lelikhulu. Bantfu basemhlabeni bayakhosela emtfuntini wetimphiko takho.

⁸ Badla indvodla yekudla, badzimate besutse endlini yakho, ubanatsise emanti emfuleni wakho wentfokoto,

⁹ ngobe nguwe umtfombo wekuphila, kukhanya sikubona ekukhanyeni kwakho.

¹⁰ Chubeka nawo lowo musa wakho, kulabo labakwatiko, uchubeke nekulunga kwakho kulabacotfo ngenhlitiyo.

¹¹ Ungaluvumeli lunyawo lwalotigcabhako kutsi lunginyatsele, nalabangamesabi Nkulunkulu kutsi bangicoshe.

¹² Lababi bawe khona lapho bawiswe phansi, bangeke bavuke.