Tihlabelelo 35 - Siswati 1996 Bible

Kucela kwephulwa etitseni

Sihlabelelo saDavide.

¹ Cabana nalabo labacabana nami, ulwe nalabo labalwa nami, Simakadze.

² Tsatsa lihawu lelincane nalelikhulu, uphutfume utengisita!

³ Hoshula sikhali sakho, uvimbe labo labangicoshako; khuluma emphefumulweni wami, utsi: “Mine ngiyinsindziso yakho!”

⁴ Shangatsi bangajabha, bahlazeke, labo labafuna umphefumulo wami; shangatsi bangahlakateka labo labacondze kungicitsa.

⁵ Ababe njengemakhoba wona apheshulwa ngumoya, ingilosi yaSimakadze isabadvungulula.

⁶ Indlela yabo ayihlwe, ishelele, ingilosi yaSimakadze isabacosha.

⁷ Njengobe bangibekele lugibe ngaphandle kwesono, bangimbela umgodzi lolugibe ngingenacala,

⁸ shangatsi bangehlelwa yimbhubhiso ngekutumeka lokukhulu, nelugibe labangetsiye ngalo lubambe bona. Umgodzi lolugibe labangetsiye ngawo uhholokoshisele bona, babhubhe.

⁹ Ngako umphefumulo wami uyawujabula kuSimakadze, ujabule nangensindziso yakhe.

¹⁰ Ematsambo onkhe ami ayawutsi: “Yebo, Simakadze, ngubani lofana nawe, wena lokhulula lobutsakatsaka etandleni tesichwaga, ukhulule lobutsakatsaka naloweswele etandleni temcindzeteli?”

¹¹ Kuvumbuka bofakazi labanebudlova, bangibuta tintfo lengingatati.

¹² Bangiphindzisela lokuhle ngalokubi, umphefumulo wami bawudzabukisile.

¹³ Kantsi nakugula bona, mine ngembatsa inzilo; umphefumulo wami ngawugongonya ngekuzila, noko ngacinisela ekuthandazeni.

¹⁴ Kimi kwafanana nekutsi babangani bami nome bomnaketfu. Ngahamba ngikhala, kwaba shangatsi ngifelwe ngumake, ngadzabuka ngaba nelusizi.

¹⁵ Kodvwa kwatsi nangikhubeka ngiwa, batsakasa, bahlangana ndzawonye; bahlanganela kumelana nami, tinkhubela lengingatati tingihlanganyela tinginyembenye siphelane.

¹⁶ Labantfu bashuca nalabahlambalata Nkulunkulu, bahlose bubi ngami.

¹⁷ Simakadze, kuyawuze kube ngunini ungibukelela? Ngisindzise ebudloveni babo, wephule umphefumulo wami kulamabhubesi!

¹⁸ Ngiyawubonga ebandleni lelikhulu ngikudvumise nasemkhambatsini lomkhulu webantfu.

¹⁹ Ungativumeli titsa tami, letingicambela emanga, kutsi titijabulise ngami. Ungabavumeli labangitondzela lite kutsi baficelane emehlo ngami, bangente inhlekisa.

²⁰ Abakhulumi lokumele kuthula, kodvwa bacala tindzaba letingemanga ngebantfu labanekuthula eveni.

²¹ Bakhamise imilomo yabo, bakhuluma baphambane nami, batsi: “Hha! Hha! Sikubonile lokukhulu!”

²² Nawe, Simakadze, wakubona lokwenteka; ngako-ke phutfuma ungabindzi, ungakhweshi kimi, Simakadze.

²³ Phaphama uvuke, ungiphutfume, Nkulunkulu wami, Nkhosi yami, ngikhulumele ungimele ecaleni lami.

²⁴ Awu, Simakadze, Nkulunkulu wami, ngehlulele ngekulunga kwakho; ungabavumeli kutsi bangente inhlekisa.

²⁵ Ungabavumeli bangicoloshele, batsi: “Yehhehhe! Nako-ke lebesikufuna!” Ungabavumeli bakhulume batsi: “Sesimehlulile.”

²⁶ Bonkhe labatsakasela kuhlupheka kwami abahlazeke, badliwe ngemahloni, abembatsiswe emahloni nelihlazo labo labangicoloshelako.

²⁷ Labo labatsakasele kutsi ngimsulwa abamemete ngekujabula batfokote, njalonjalo, batsi: “Akadvunyiswe Simakadze, lojabulela inhlalakahle yenceku yakhe!”

²⁸ Ngako lulwimi lwami luyakhuluma, lumemetele ngekulunga kwakho, lukudvumise onkhe emalanga.