Tihlabelelo 34 - Siswati 1996 Bible

Kubonga kukhululwa elusizini

Sihlabelelo saDavide. Davide watihlanyisa embikwenkhosi Abimeleki, yabe seyiyamcosha; nasahambile wacamba ingoma letsi:

¹ Simakadze ngiyawumbonga ngato tonkhe tikhatsi, ngimdvumise ngemlomo wami ngingakhawuli.

² Umphefumulo wami utigabatisa ngaSimakadze, labahluphekako abeve bajabule.

³ Dvumisani Simakadze kanye nami, siphakamise libito lakhe kanyekanye.

⁴ Ngakhuleka kuSimakadze, wangiphendvula, wangikhulula kuko konkhe kwesaba kwami.

⁵ Lababheka kuye bayamamatseka, buso babo bungeke budliwe ngemahloni.

⁶ Ngangingumuntfu losihlupheki, ngakhala kuSimakadze, wangiva, wangisindzisa kuko konkhe kuhlupheka kwami.

⁷ Ingilosi yaSimakadze yakha umtsangala lotungeleta labo labamesabako, ibakhulule, iphindze ibavikele.

⁸ Ase ninambitse nibone kutsi Simakadze muhle unemusa! Ubusisiwe lowo lokhosela kuye!

⁹ Yesabani Simakadze, nine labangcwele, ngobe abesweli lutfo labamesabako.

¹⁰ Ngisho nemabhongwana emabhubesi ayeswela alambe, kodvwa labo labafuna Simakadze bangeke beswele lutfo loluhle.

¹¹ Wotani, bantfwabami, ningilalele, ngitanifundzisa kumesaba Simakadze.

¹² Ngubani lotsandza kuphila adzimate adle tinyoni tebantfwabakhe?

¹³ Lowo-ke akagcine lulwimi lwakhe ebubini, netindzebe takhe tingakhulumi emanga.

¹⁴ Khwesha kulokubi wente lokuhle; funisisa kuthula, ukubambisise.

¹⁵ Emehlo aSimakadze akesuki kulabalungile, tindlebe takhe atisuki ekukhaleni kwabo.

¹⁶ Buso baSimakadze buphambene nalabenta lokubi, kuze abashabalalise, bangabe basakhunjulwa emhlabeni.

¹⁷ Labalungile nabakhala bacela lusito, Simakadze uyabeva, abakhulule kuto tonkhe tinhlupheko tabo.

¹⁸ Simakadze uhlala asedvute nabo labanetinhlitiyo letephukile uyabasindzisa labanemoya lowephukile.

¹⁹ Lolungile uhlala ajingwe tinhlupheko letinyenti, kodvwa Simakadze umkhulula kuto tonkhe,

²⁰ alondvolote onkhe ematsambo akhe, kungephuki ngisho nome linye.

²¹ Sikhohlakali siyawubulawa ngulokubi, nalabatondza lolungile bayawudliwa licala.

²² Simakadze uyakuhlenga kuphila kwetinceku takhe, labakhosela kuye bangeke badliwe licala.