Tihlabelelo 33 - Siswati 1996 Bible

Ingoma yekudvumisa

¹ Yetsabani kuSimakadze, nine lenilungile; ingoma yekudvumisa ibafanele labacotfo.

² Simakadze mdvumiseni ngetingubhu, nihlabele kuye ngehabhu lenetintsambo letilishumi.

³ Mhlabeleleni ingoma lensha, niyidlale ngebuciko, nimemete ngekujabula.

⁴ Ngobe livi laSimakadze licondzile, konkhe lakwentako kwetsembekile.

⁵ Simakadze utsandza kulunga nebumsulwa. Umhlaba ugcwele umusa waSimakadze.

⁶ Emazulu entiwa ngelivi laSimakadze, nako konkhe lokukuwo kwentiwa ngemoya wemlomo wakhe.

⁷ Emanti elwandle wawabutsela ndzawonye, kwaba shangatsi uwagcwalisa embiteni; wenta titiba netitibakati tetilwandle.

⁸ Umhlaba wonkhe awumesabe Simakadze, bonkhe labasemhlabeni abatfutfumele embikwakhe.

⁹ Ngobe wakhuluma, kwenteka; wakhalima, kwaba khona lutfo.

¹⁰ Simakadze ucitsa emacebo etive; ushabalalisa imicabango yebantfu.

¹¹ Emasu aSimakadze ayawuhlala emile kuze kube phakadze; nemicabango yakhe iyawuhlala imile kuto tonkhe titukulwane.

¹² Sibusisiwe leso sive lesiNkulunkulu waso kunguSimakadze, sive latikhetsele sona kutsi sibe lifa lakhe.

¹³ Simakadze, asezulwini, uyabuka emhlabeni abone bonkhe bantfu.

¹⁴ Asesesihlalweni sakhe sebukhosi ubukisisa bonkhe labahleti emhlabeni;

¹⁵ nguye lobumba tonkhe tinhlitiyo tabo, abukisise tonkhe tento tabo.

¹⁶ Kute inkhosi lencoba sitsa ngobe inemabutfo lamanyenti, nesichwaga asincobi ngebunyenti bemandla aso.

¹⁷ Lihhashi lemphi lingeke likukhulule; nome lingaba nemandla lamakhulu, lingeke likusindzise.

¹⁸ Empeleni liso laSimakadze likulabo labamesabako, yebo labo labetsemba umusa wakhe,

¹⁹ kutsi atewukhulula umphefumulo wabo ekufeni abaphilise endlaleni.

²⁰ Umphefumulo wetfu wetsembele kuSimakadze, yena ungumsiti wetfu nelihawu letfu.

²¹ Inhlitiyo yetfu ijabula kuye, ngobe setsembele egameni lakhe lelingcwele.

²² Yebo, Simakadze! Umusa wakho awusembese njengobe setsembele kuwe.