Tihlabelelo 32 - Siswati 1996 Bible

Inhlanhla yekutsetselelwa tono (Sihlabelelo sesibili sekutisola)

Sihlabelelo saDavide, lesiyimaskili.

¹ Ubusisiwe umuntfu lotsetselelwe tiphambuko takhe, nalotono takhe tisitjekelwe.

² Ubusisiwe umuntfu Nkulunkulu langambaleli tiphambuko takhe, lonenhlitiyo lete inkhohliso.

³ Nangingasivumi sono sami, ngidzangaliswa kutikhalela lilanga lonkhe, kuze kushaye ekhatsi emnkantjeni.

⁴ Imini nebusuku sandla sakho sasimatima etikwami, emandla ami oma njengekomisa kwasehlobo. Cabanga.

⁵ Ngasivuma kuwe sono sami, angizange ngisifihle siphambuko sami. Ngatsi: “Ngiyawutivuma kuSimakadze tono tami.” Wena walitsetselela licala lesono sami. Cabanga.

⁶ Ngako-ke wonkhe longcwele uyawuthandaza kuwe ngesikhatsi usenekutfolakala. Ngempela ngesikhatsi emagagasi etinhlupheko adlondlobala, angeke amkhukhule.

⁷ Wena uyindzawo yami yekubhaca, uyangiphephisa ekuhluphekeni ungisingatse ngetingoma tenkhululeko. Cabanga.

⁸ Simakadze utsi: “Mine ngiyawukufundzisa ngikukhombise indlela lofanele kuhamba ngayo, ngikweluleke, liso lami lingesuki kuwe.

⁹ Ningabi njengelihhashi nome umnyuzi kona lokungenakucondza kudzimate kucondziswe ngematomu.”

¹⁰ Lomubi unekuhlupheka lokunyenti, kodvwa lowo lowetsembele kuSimakadze uhlala alondvolotwe ngumusa wakhe.

¹¹ Jabulani kuSimakadze, netsabe, nine lenilungile. Nijabule nonkhe nine lenicotfo ngenhlitiyo.