Tihlabelelo 31 - Siswati 1996 Bible

Sekukhombisa kwetsembela kuSimakadze

Sihlabelelo saDavide lesetfulwe kumhlabelisi.

¹ Simakadze wena usiphephelo sami, ungacali ungijabhise, ngephule ngekulunga kwakho.

² Sondzeta indlebe yakho, ungephule ngekushesha, bani lidvwala lesiphephelo sami nenqaba yekungisindzisa.

³ Wena ulidvwala lami nenqaba yami, ngihole ungicondzise ngenca yelibito lakho.

⁴ Ngengcise elugibeni labangiciphe ngalo, ngobe wena usiphephelo sami.

⁵ Nginikela umoya wami esandleni sakho, ungihlengile wena Simakadze; unguNkulunkulu lowetsembekile.

⁶ Ngiyabatondza labakhonta tithico, mine ngetsembele kuSimakadze.

⁷ Ngiyakwetsaba ngijabule ngemusa wakho, ngobe wena ukubonile kuhlupheka kwami, watati tinsizi temphefumulo wami.

⁸ Awunginikelanga esandleni sesitsa, tinyawo tami utimise endzaweni lebanti.

⁹ Bani nemusa kimi, Simakadze, ngobe ngisenhluphekweni, emehlo ami asaphandlwe kuhlupheka, kantsi umphefumulo wami nemtimba wami kukhatsele tinhlupheko.

¹⁰ Kuphila kwami kuphelela elusizini, neminyaka yami iphelela ekubibitsekeni; emandla ami aphelile ngenca yekona kwami, nematsambo ami acindzetelekile.

¹¹ Sengaba yinhlamba ngenca yalabamelene nami, ikakhulu kubomakhelwane bami; labangatiko sebayangesaba, nangihlangana nabo endleleni bayangibalekela.

¹² Angisakhunjulwa ngumuntfu, ngifana nalofile; senginjengembita lefile yalahlwa etaleni.

¹³ Yebo, ngiva labanyenti bayangihleba, ngihlala ngetfuka tanya. Bangakhela emacebo, bahlose kungibulala.

¹⁴ Kodvwa mine ngetsembele kuwe, Simakadze, ngitsi: “Wena unguNkulunkulu wami.”

¹⁵ Emalanga ekuphila kwami asesandleni sakho, ngephule esandleni setitsa tami nakubo labangitingelako.

¹⁶ Inceku yakho ayibuve bukhona bakho, ngisindzise ngemusa wakho longapheli.

¹⁷ Simakadze, ungangidvumati nangikubita, lababi abadliswe ngemahloni. Abavalwe imilomo baye ekufeni.

¹⁸ Shangatsi imilomo lecala emanga ingabindziswa, ngobe ihlambalata lolungile, ikhulume ngekutigcabha nangekwedzelela.

¹⁹ Maye, kuyaphuphuma kulunga kwakho, lokulunga lokugcinele labo labakwesabako, ukwente kulabo labakhosele kuwe, ukubonakalise embikwebantfu.

²⁰ Ubafihla ekusitsekeni kwebukhona bakho, baphephe kulabo lababakhela lugibe; ubabhacisa endlini yakho, baphephe etinkhulumeni tembango.

²¹ Akadvunyiswe Simakadze, ngobe umusa wakhe lomangalisako uwentile kimi ngesikhatsi bangivimbetela edolobheni.

²² Ngetfuka ngadzimate ngakhuluma ngatsi: “Sengisusiwe ngacoshwa ebusweni bakho.” Kodvwa wena wakuva kuncusa kwami, nangicela lusito kuwe.

²³ Tsandzani Simakadze, nine nonkhe labangcwele bakhe. Simakadze uyabagcina labetsembele kuye, kodvwa uphindzisela kamatima kulabatatisako.

²⁴ Cinani, tinhlitiyo tenu tibe nesibindzi, nonkhe nine lenilindzele Simakadze.