Tihlabelelo 30 - Siswati 1996 Bible

Kubonga kukhululwa ekufeni

Sihlabelelo saDavide lesiyingoma yekuhlatjelwa nakuvulwa indlu yaNkulunkulu.

¹ Ngiyawukudvumisa, Simakadze, ngobe ungenyule ebunzimeni, wala kutsi titsa tami titijabulise ngami.

² Yebo, Simakadze, Nkulunkulu wami, ngatikhalela ngicela lusito kuwe, wena wangiphilisa.

³ Yebo, Simakadze, ungikhiphile endzaweni yalabafile, waphephisa kuphila kwami emkhatsini walababange ekufeni.

⁴ Nine labangcwele bakhe, hlabelani nidvumise Simakadze, nibonge libito lakhe lelingcwele.

⁵ Ngobe kutfukutsela kwakhe kuba kwesikhashana, kodvwa umusa wakhe uhlala ukhona njalo umuntfu asaphila. Tinyembeti tingaba khona ebusuku, kodvwa ngakusasa ekuseni kube kujabula.

⁶ Mine-ke ngisahleti kahle ngatsi: “Ngingeke ngitanyatanyiswe.”

⁷ Yebo, Simakadze, wangimisa ngaba njengentsaba lecinile; kodvwa watsi kube ungifulatsele, ngahlaselwa kwesaba.

⁸ Ngakhala kuwe, Simakadze, ngancusa eNkhosini ngatsi:

⁹ “Nzuzo yini leyawutfolakala ngekubhujiswa kwami, nangabe sengiye ethuneni? Bantfu lese babuyele elutfulini bangakubonga yini? Bangakhuluma yini ngekwetsembeka kwakho?

¹⁰ Ngive, Simakadze, ube nemusa kimi. Yebo, Simakadze, bani ngumsiti wami!”

¹¹ Ugucule kulila kwami kwaba ngumgidvo, ungikhumule ingubo yenzilo, wangembatsisa ngekungibopha ngenjabulo.

¹² Ngako-ke umphefumulo wami uyawukudvumisa ungabindzi. Yebo, Simakadze, Nkulunkulu wami, ngiyawukudvumisa phakadze naphakadze.