Tihlabelelo 29 - Siswati 1996 Bible

Liphimbo laSimakadze esivunguvungwini

Sihlabelelo saDavide.

¹ Dvumisani Simakadze nine tingilosi telizulu! Simakadze mnikeni bukhosi nemandla!

² Libito laSimakadze linikeni bukhosi lobulifanele. Khontani Simakadze ngetembatfo tebungcwele.

³ Liphimbo laSimakadze lisetikwemanti, Nkulunkulu weludvumo uyadvuma, Simakadze usetikwemanti lamanyenti.

⁴ Liphimbo laSimakadze linemandla. Liphimbo laSimakadze linebukhosi.

⁵ Liphimbo laSimakadze lifohlota tihlahla temisedari, Simakadze ufohlota imisedari yaseLebanoni.

⁶ Wenta lemisedari yaseLebanoni itjakadvule njengelinkhonyane; ente iLebanoni neSiriyoni itjakadvule njengenkhabi lencane yesiganga.

⁷ Liphimbo laSimakadze libaneka emalangabi emlilo.

⁸ Liphimbo laSimakadze linyakatisa lihlane. Simakadze utfutfumelisa lihlane laseKhadeshi.

⁹ Liphimbo laSimakadze litalisa tinyamatane liphundle emahlatsi asale akhanya, nelithempeli lonkhe lidvumisa ngekumemeta ngavi linye, litsi: “Ludvumo!”

¹⁰ Simakadze usesihlalweni sebukhosi, ubusa zamcolo. Simakadze usesihlalweni sebukhosi, kuze kube phakadze naphakadze.

¹¹ Simakadze bantfu bakhe uyawubanika emandla! Simakadze, bantfu bakhe uyawubabusisa ngekuthula!