Tihlabelelo 28 - Siswati 1996 Bible

Umthandazo wekucela lusito nekubonga imphendvulo

Sihlabelelo saDavide.

¹ Ngikhala kuwe, Simakadze, Dvwala lami. Ungabi sihhulu kimi, ngobe nangabe ungangiphendvuli, ngitawufana nalabaya ethuneni.

² Lalela livi lekuncusa kwami, nangikhalela kusitwa nguwe, nangisaphakamisela tandla tami endzaweni yakho lengcwelengcwele.

³ Ungangilahli kanye nalababi, ungangilahli kanye nalabenta lokubi, labakhuluma kuthula nabomakhelwane babo, kantsi etinhlitiyweni tabo bamumetse bubi.

⁴ Banike njengekwemisebenti yabo, nanjengekwemisebenti yabo lemibi; baphindzisele ngekwemisebenti yetandla tabo, baphindzisele njengalokubafanele.

⁵ Njengobe bangayinaki imisebenti yaSimakadze, nome-ke imisebenti yetandla takhe, ngako-ke utabaphihlita, bangaphindzi babuyele esimeni sabo.

⁶ Akabongwe Simakadze, advunyiswe, ngobe ulivile livi lekuncusa kwami.

⁷ Simakadze ungemandla ami nesihlangu sami, inhlitiyo yami yetsembele kuye. Wangisita, ngako inhlitiyo yami igcunyagcunyiswa yinjabulo. Ngiyawumbonga ngengoma yami.

⁸ Simakadze ungemandla ebantfu bakhe, usiphephelo sekusindzisa logcotjiwe wakhe.

⁹ Sindzisa sive sakho, ubusise labo labalifa lakho. Beluse ubetfwale, kuze kube phakadze naphakadze.